Naniniwala ang Malakanyang at Department of Health (DOH) na hindi isang pathologist si Dr. Erwin Erfe ng Public Attorney’s Office (PAO).
Ayon kay Justice Secretary Vitaliano Aguirre, nagkasundo sila na si Erfe ay isa lamang medico –legal officer at ano man ang naging pahayag nito ukol ikinamatay ng mga batang nabakunahan ng dengvaxia ay hindi maituturing na galing sa eksperto.
Una nang kinuwestyon ng grupo ng mga doktor sa pangunguna ni dating Health Secretary Esperanza Cabral ang otoridad at kwalipikasyon ni Erfe para magasagawa ng otopsiya sa mga bangkay ng mga biktima.
Kaugnay nito, pupulungin ni Pangulong Rodrigo Duterte ang ilang opisyal kaugnay sa kontrobersiyal na dengvaxia ngayong araw, Pebrero 8.
Dadalo sa naturang pagpupulong sina Health Secretary Francisco Duque III, Justice Secretary Viataliano Aguirre, Public Attorney’s Office Chief Percida Acosta at Presidential Anti – Corruption Commission Head Dante Jimenez.
Sa magiging pulong, nais na ihirit ni Aguirre ang pangangailangan na kumuha ng isang dayuhang clinical pathology expert para ma–establish ang posibleng kaugnayan ng pagkamatay ng mga biktima at ng itinurok na dengvaxia sa mga ito.
Sa kabila nito, sinabi ni Aguirre na magpapautloy ang ginagawang imbestigasyon ng PAO hangga’t wala pang desisyon ukol dito ang Malakanyang.
