Walang nakikita sa ngayon ang pulisya na anumang indikasyon na dinukot ang 17 anyos na si Ica Policarpio.
Pero ayon kay NCRPO Chief Police Director Oscar Albayalde, hindi pa nila tuluyang isinasantabi ang posibilidad ng kidnapping sa kasong ito dahil patuloy pa anila ang kanilang imbestigasyon.
Sa ngayon, ayon kay Albayalde, isa sa tinitingnan nilang anggulo ay kung may taong nag-udyok sa dalagita kaya ito nawala ng tatlong araw.
Umapela naman ang pulisya sa publiko na hayaan munang makapagpahinga si Ica.
Kahit ang ama nito na si Atty Ruffino Policarpio ay nagsabing hindi muna nila ipinapakwento kay Ica ang buong pangyayari ng pagkawala nito.
Ayon kay Atty Policarpio, natagpuan ang kanyang anak ng mga opisyales ng Baranggay 2-B sa San Pablo City Laguna habang nakaupo at umiiyak sa isang karinderya doon.
