Pinalagan ni dating DPWH Secretary Rogelio Singson ang akusasyon na sangkot siya kasama sina Budget Secretary Florencio Abad at bayaw ni dating Pangulong Noynoy Aquino sa right of way scam sa General Santos City.
Kaugnay ito sa ibinulgar ng isang Roberto Catapang Jr. na sumulat si Eldon Cruz, asawa ni Ballsy Aquino kay Singson noong Enero 2011 para hilinging maglabas ng bayad ang Department of Budget and Management (DBM) sa isang bogus right of way claim na nagkakahalaga ng 8.7 bilyong piso.
Ayon kay Singson, walang katotohanan ang sinasabi ni Catapang at peke ang sulat na inilabas nito.
Aniya, may ilang dokumento din siyang natanggap na tulad ng naturang liham kung saan ginagamit din ang ilang malalaking pangalan sa gobyerno.
Posible din aniyang miyembero ng land scam syndicate ang witness na sinasabing nag – o – operate sa Region 12 .
Matatandaang mismong si Justice Secretary Vitaliano Aguirre ang nagprisinta kay Catapang sa media noong Lunes.
