Posibleng kabilang ang mga case file ng mga pagpatay sa mga teenager na sina Kian Delos Santos at Carl Angelo Arnaiz sa mga naabo nang masunog ang Caloocan City Police Headquarters ngayong Martes, Nobyembre 14.
Gayunman, inihayag ni Senior Superintendent Jemar Modequillo, mayroon naman silang kopya sa Northern Police District at National Capital Region Police Office o NCRPO at hindi din naman maka-aapekto sa kaso kahit nasunog na ang mga file nito.
Ayon kay Modequillo, lahat ng police documents mula sa dialogue hanggang homicide cases ay isinusumite sa kanilang mga superior office gaya ng mga district at regional police offices.
Dakong 4:30 ng madaling araw nang sumiklab ang sunog sa headquarters sa Samson Road, University Hills at naapula ng Bureau of Fire Protection o BFP, makalipas ang dalawang oras.
Wala namang nasugatang pulis, sibilyan o bilanggo sa sunog habang inaalam pa sanhi nito.
