Makalipas ang higit anim na oras ay nasagip na ang lahat ng dalawampu’t limang (25) pasahero ng DLTB bus na naipit sa baha sa Pitogo-Gumaca Road sa lalawigan ng Quezon.
Ayon kay Quezon PNP Provincial Director, Senior Superintendent Roderick Armamento, alas-9:30 nang mailigtas ng pinagsanib na pwersa ng pulisya, militar at iba pang rescuer ang mga pasahero ng DLTB bus na alas-3:00 ng umaga pa stranded sa baha.
Napaakyat pa aniya sa bubong ng bus ang mga pasahero dahil pumasok na sa loob ng sasakyan ang halos lagpas-taong baha.
Ayon kay Armamento gumamit sila ng mga bangka para masagip ang mga pasahero na nasa tabi ng ilog.
—-
