Patuloy ang pag-alalay ng DOH o Department of Health sa mga residenteng nagsilikas dahil sa kaguluhan sa Marawi City.
Ayon kay Dr. Eric Tayag, tagapagsalita ng DOH, higit tatlumpu’t pitong libong (37,000) indibidwal na ang nabigyan ng nutrition assessment at counselling hinggil sa breastfeeding at mga may problema sa malnutrisyon.
Aabot naman sa 27,000 indibiduwal ang sumailalim sa psychological counselling, habang higit sa pitong libo (7,000) ang nabakunahan at nabigyan ng pampurga.
Sa kasalukuyan, mayroong naka-deploy na limang daan at tatlumpu’t tatlong (533) health personnel sa Marawi.
Samantala, nanawagan sa militar ang mga lumikas na residente ng Marawi City na tapusin na ang airstrike sa kanilang lungsod.
Giit ng mga apektadong residente, nasi na nilang bumalik sa kanilang mga tahanan lalo’t hindi na umano nila matagalan ang sitwasyon sa mga evacuation center.
Nagpaliwanag naman si Joint Task Force Marawi Lt. Col. Jo-Ar Herrera kung saan sinabi nitong kailangan nila ang airstrike para matalo ang grupo ng Maute.
Kasabay nito, tiniyak naman ni Herrera na malapit nang makabalik sa kanilang mga lugar ang mga apektado ng bakbakan sa Marawi City.
By Meann Tanbio | ulat ni Aya Yupangco (Patrol 5) / Ralph Obina
DOH patuloy ang ayuda sa mga lumikas mula Marawi was last modified: July 20th, 2017 by DWIZ 882