Binuweltahan ni Defense Secretary Delfin Lorenzana ang grupong Gabriela matapos na akusahan siyang nagpapakalat ng fake news.
Ayon kay Lorenzana, ang Gabriela ang nagpapakalat ng mga pekeng balita tulad ng akusasyong tinatakot ng mga sundalo ang mga babaeng taga Marawi City na gagahasain kung hindi magsisilikas.
Aniya, nakadududang agad na nakausap ng Gabriela ang mga umano’y binantaan ng mga sundalo sa una at tanging pagbisita ng grupo.
Hinala ni Lorenzana, gawa-gawa lamang ng Gabriela ang umano’y rape threat at wala talagang mga biktima.
Hinamon din ng kalihim ang Gabriela na magsampa ng kaukulang reklamo kaugnay ng akusasyon.
Kasabay nito, tiniyak pa ni Lorenzana na nakahanda siyang parusahan ang mga sundalong mapapatunayang nagkasala.
By Krista De Dios | With Report from Jonathan Andal
