Tatlong (3) commanders ng MILF o Moro Islamic Liberation Front at 2 commanders ng BIFF o Bangsamoro Islamic Freedom Fighters ang kabilang sa mga pinakakasuhan ng murder kaugnay sa tinaguriang Mamasapano clash noong Enero ng taong ito.
Matatandaan na mahigit 60 katao ang nasawi sa sagupaan kabilang ang 44 na Special Action Force commandos ng Philippine National Police (PNP).
Ayon sa joint special investigation team mula sa National Bureau of Investigation at National Prosecution Service, 102 ang inirekomenda nilang isalang sa preliminary investigation sa Department of Justice para sa kasong direct assault with murder.
Ang tatlong MILF commanders na inirekomendang kasuhan ay sina Ben Tikaw, Makku Tikaw at Salik Kukuk samantalang sa panig ng BIFF ay sina Operations Commander Mer Amilil at Battalion Commander Muslimin Gumanding Amilil.
Matatandaang noong Abril, sinabi ni Justice Secretary Leila de Lima na 90 katao mula sa MILF, BIFF at private armed groups ang kanilang pinagkakasuhan subalit wala itong inilabas na mga pangalan.
Anumang araw mula ngayon ay inaasahang ilalabas na ng DOJ ang resulta ng pangalawang bahagi ng kanilang imbestigasyon.
By Len Aguirre