Patuloy na ginagamot ngayon sa East Avenue Medical Center ang pitong bata matapos umanong ma-food poison dahil sa kinaing pizza sa lunsod ng Quezon.
Ayon kay Ginang Teresita Credo ng Barangay Silangan, agad nilang isinugod sa pagamutan ang kanyang apat na anak, dalawang apo at isang kaanak dahil sa patuloy na pananakit ng tiyan at pagsusuka.
Pahayag ni Credo, napansin nila ang sabay-sabay na pagsakit ng tiyan ng mga bata pagkatapos nilang kumain ng pizza na kanilang binili sa Brgy. Pag-asa, dakong 5:00 ng hapon, kahapon.
Base sa ulat, nasa 9 hanggang 17 ang edad ng mga bata na nabiktima umano ng food poisoning.
Patuloy namang iniimbestigahan ng mga otoridad ang nasabing insidente.
