Ibinunyag ng US Pacific Command na nagpakawala ng tatlong short-range ballistic missiles sa Kangwon province ang North Korea.
Ang pagpapakawala ng ballistic missile ng NoKor ay isinagawa ilang araw matapos purihin ni US Secretary of State Rex Tillerson ang bahagyang pananahimik ng Pyongyang hinggil sa kanilang weapons program.
Ayon kay Commander David Benham, tagapagsalita ng US Pacific Command, pumalya ang una at ikatlong missile sa himpapawid habang ang ikalawang missile launch ay pumalpak din.
Ginawa ang missile launch sa gitna na rin ng taunang military exercises sa pagitan ng Estados Unidos at South Korea sa Korean Peninsula.
Bagama’t iginiit ng NoKor na may kakayahan na silang magpalipad ng missile sa US mainland, binigyang diin ng US Defense officials na ang mga ipinagmamalaking short-range missiles ay hindi banta sa North America o Guam.
