Balik nang muli ang National Bureau of Investigation (NBI) sa mga operasyon kontra iligal na droga.
Ito ay matapos bawiin ni Justice Secretary Aguirre ang kanyang ipinalabas na kautusan noong Oktubre na inaatasan ang NBI na ipaubaya sa Philippine Drug Enforcement Agency o PDEA ang lahat ng anti – illegal drugs operations.
Kasabay nito, inatasan din ni Aguirre si NBI Director Dante Gierran na magsumite ng report sa kanilang mga isinasagawang imbestigasyon at operasyon kada buwan.
Gayunman, binigyang – diin ni Aguirre na mananatili ang PDEA bilang lead agency sa mga operasyon kontra iligal na droga.
Matatandaang inanunsyo ni Pangulong Rodrigo Duterte ang pagbabalik ng PNP sa kampanya kontra iligal na droga bilang katuwang ng PDEA na mananatiling lead agency dito.
Una nang inamin ni PDEA Director General Aaron Aquino na kulang ang tauhan, pondo at kagamitan ng PDEA para hawakan ng mag – isa ang nationwide war on drugs campaign.
