Itinanggi ni Philippine National Police o PNP Chief Director General Ronald “Bato” Dela Rosa ang ulat na nagsumite siya ng position paper sa Malakanyang, kung saan kanyang sinang-ayunan ang panukalang hindi isama sa bibigyan ng omento ang mga retiradong pulis.
Kasunod ito ng reklamo ng ilang retirees na hindi sila kabilang sa programa ng administrasyon Duterte na magbigay ng dagdag sahod sa mga pulis sa susunod na taon.
Giit ni Dela Rosa, tali ang kamay ng PNP dahil nakadepende pa rin sila sa polisiya ng Malakanyang at Department of Budget and Management o DBM para sa dagdag sahod at pension ng mga pulis.
Kasabay nito, nangako si Dela Rosa na kanyang gagawing quadruple ang sweldo at pension ng mga pulis kapag siya na aniya ang Presidente ng Pilipinas.
Dagdag ni Dela Rosa, kanyang naiintindihan ang pagiging sensitive ng mga retiradong pulis sa ilang mga usapin at nirerespeto ang mga ito.
Hinimok naman ni Dela Rosa ang police officers na kausapin ang retirees at ipaliwanag na ang planong omento sa sahod ay kasalukuyan pa ring inaayos.
