Personal na binisita ni Pangulong Rodrigo Duterte ang burol ng pulis na nasawi matapos gawing pananggalang ang sariling katawan sa sumabog na granada sa isang kolehiyo sa Misamis Oriental noong nakaraang linggo.
Kasabay nito, ginawaran ni Pangulong Duterte ng Order of Lapu-Lapu Magalong medal at Philippine National Police Medal of Valor ang nasawing pulis na si Master Sergeant Jason Magno.
Binigyan din ng Pangulo ng tulong pinansiyal ang naulilang pamilya ng nasawing pulis.
Magugunitang, rumesponde si Magno at kasamahang si Police Master Sergeant Alice Balido matapos makatanggap ng tawag hinggil sa pag-aamok ng isang lalaking may dalang patalim at granada sa loob ng Initao College.
Batay sa ulat, iniharang ni Magno ang kanyang katawan nang ihagis ng suspek ang dala nitong granada para mailigtas ang mga estudyante, guro at iba pang sibilyan sa lugar.
Sugatan naman sa insidente ang kasamahan ni Magno na si Balido, 10 estudyante at lima pang sibilyan.
