Kinontra ng isang dating opisyal ng Philhealth ang plano ng samahan ng mga pribadong ospital na tanggalin na ang kanilang accreditation sa Philhealth dahil sa utang nito na umaabot na sa bilyon – bilyong halaga.
Ayon kay Dr. Anthony Leachon, isang health advocate, hindi dapat na takutin ng mga private hospitals ang gobyerno dahil malinaw na pagtalikod ito sa kanilang obligasyon na gamutin ang mga may sakit.
Bukod dito ay paglabag ito sa itinatalaga ng Universal Health Care Law na nagsisiguro ng mabibigyan ng pagkalingang medikal ang lahat ng Pilipino.
“Ang private hospitalization, umatras ho sa responsibilidad nila. Wag nilang takutin ang government kasi ang lalabas anti-government ka. Ang mag sa-suffer niyan ay yung mga pasyente na member ng Philhealth na gustong pumunta sa ospital nila,” ani Leachon.
Sinabi ni Leachon na sa halip na manakot sa media ay makipag usap na lamang ang mga pribadong ospital upang masolusyon ang kanilang mga hinaing laban sa Philhealth.
“Ayusin natin ang problema. Wag tayong pupunta sa radyo at sasabihin natin na ‘oh, umalis na tayo’, eh at the end of the day, sino ang magsa-suffer? Pasyente. At in the long run, pati yung mga ospital. Mag usap tayo. Ayusin natin kung ano bang problema. Wala naman hong problemang hindi maso solve kapag pinag usapan ho natin eh,” ani Leachon — sa panayam ng Ratsada Balita
