Nagpaabot ng pakikiramay ang pamunuan ng Philippine National Police o PNP sa naulilang pamilya at kaanak ng abogadong si Atty. Rex Fernandez.
Ito’y makaraang walang habas na pagbabarilin ng mga hindi pa tukoy na salarin si Fernandez habang sakay ng kaniyang kotse sa kalye Duterte, Guadalupe, Cebu City kahapon ng hapon.
Ayon kay PNP Chief P/Gen. Guillermo Eleazar, batid niya ang nararamdaman ngayon ng legal community at kaisa sila sa pagkondena sa mga walang habas na pagpatay sa kanilang hanay.
Dahil dito, inatasan na ni Eleazar ang Police Regional Office 7 o Central Visayas Regional PNP na tutukan at resolbahin ang kaso sa lalong madaling panahon.
Nanawagan naman ang PNP Chief sa mga may hawak ng impormasyon hinggil sa insidente na lumantad at magbigay pahayag upang makatulong sa pagkakamit ng hustisya at maagap na pagresolba sa kaso.— ulat mula kay Jaymark Dagala (Patrol 9)
