Umaasa si Sen. Kiko Pangilinan na tutuparin ni Pangulong Rodrigo Duterte ang pangako na titigil na o kaya’y bawasan man lang ang kanyang pagmumura.
Ito ayon kay Pangilinan, ay para maging “general patronage” na sa halip na “rated R” kapag pinapanood at pinapakinggan ang mga talumpati ng Pangulo.
Aniya, sa ganitong paraan ay wala nang magiging agam-agam ang mga magulang kahit na mapakinggan ng mga bata ang public speech ng Presidente.
Ngunit, para naman kay Sen. Ping Lacson, medyo may pagka-weird at mahirap maunawaan ang isiniwalat ng punong ehekutibo.
Giit ni Lacson, hindi nagbabanta ang diyos sa sinuman para lang baguhin ang hindi magandang asal ng isang tao.
Una ang ikinuwento ng Pangulo na habang pabalik siya ng bansa matapos ang state visit sa Japan ay kinausap siya ng diyos at sinabihang pababagsakin ang eroplano kung hindi ito titigil sa pagmumura.
By: Jelbert Perdez / Cely Bueno
