Mas paiigtingin pa ng Food and Drug Administration o FDA ang kampanya nito laban sa mga pekeng gamot, kasunod ng kautusan ni Pang. Rodrigo Duterte sa Philippine National Police na arestuhin at kasuhan ang mga mapatutunayang sangkot sa iligal na gawain.
Sinabi ni FDA Director General Nela Charade Puno, ang naturang mandato ng pangulo ang nagtulak sa kanila upang agad na aksyunan at tuldukan ang paglaganap ng mga pekeng gamot sa mga pharmacies o mga botika.
Higit rin aniyang palalakasin ang pakikipag-ugnayan sa PNP upang malambat ang mga nagbebenta ng mga fake o counterfeit drugs.
Kasabay nito, pinayuhan naman ni Puno ang publiko na maging mapanuri at tiyaking government-licensed ang mga pharmacy na kanilang pagbibilhan ng anumang uri ng medisina.
Ito’y upang masiguro aniyang hindi magiging biktima ng mga pekeng gamot ang publiko na mapanganib para sa kalusugan ng isang indibidwal.
