Umabot na sa 1655 drug suspects ang napatay sa anti-illegal drugs operations ng Philippine National Police (PNP) na sinimulan noong Hulyo.
Maliban pa ito sa 13 pulis at 3 sundalo na napatay rin sa lehitimong mga operasyon ng pulisya kontra illegal drugs.
Batay sa datos ng PNP, mahigit na sa 31,000 anti-illegal drug operations ang kanilang naisagawa kung saan halos 30,000 rin ang kanilang naarestong drug suspects.
Umaabot na rin sa mahigit 2 milyong bahay ang kanilang nakatok sa ilalim ng Oplan Tokhang na nagresulta sa pagsuko ng mahigit sa 700,000 drug suspects.
Sa hanay ng mga sumuko, halos 700,000 ang drug users samantalang nasa 55,000 naman ang drug pushers.
International community
Samantala, pinayuhan ni Senator Ping Lacson ang administrasyon ng Pangulong Rodrigo Duterte na suriin kung mayroong naglo-lobby sa international community para punahin ang pagdami ng namamatay sa anti-drug operation ng pamahalaan.
Ayon kay Lacson, mayroong sapat na rason para pagdudahan ang posibleng paglo-lobby para makuha ang atensyon ng International Human Rights Groups at ng International Criminal Court.
Sinabi ni Lacson na hindi din maaaring umalma ang Pilipinas kung mag-iimbestiga ang UN at ICC sa extrajudicial killings, dahil signatory tayo sa mga kasunduan na nagbibigay kapangyarihan sa mga ito na mag-imbestiga.
By Len Aguirre | Katrina Valle | Cely Bueno (Patrol 19)
Photo Credit: AFP/ Getty Images
