Nagsisimula ng dumagsa ang mga pasahero sa pangunahing sakayan sa bansa.
Isang linggo ito bago ang pagdaraos ng Pasko at pagsalubong ng Bagong Taon.
Ayon kay Jay Santiago, General Manager ng Philippine Ports Authority (PPA), umabot na sa 57 milyong pasahero ang kanilang naitalang bumiyahe sa mga pantalan mula Enero.
Mas marami ito kumpara sa 22 milyon noong nakaraang taon.
Sa Parañaque Integrated Terminal Exchange (PITX) naman ay inaasahang papalo sa 150,000 hanggang 160,000 ang daily average ng mga pasahero lalo’t may mga biyahe ang kanilang bus hanggang Mindanao.
Sa susunod na linggo, inaasahan din ng Manila International Airport Authority (MIAA) ang dagsa ng mga pasahero sa Ninoy Aquino International Airport (NAIA).
Maliban sa PPA, NAIA at PITX, hindi naman ramdam ang dagsa ng mga pasahero sa Araneta Bus Terminal dahil limitado ang mga bus at ruta na bumibiyahe sa kanila.
Sa ngayon, paalala sa publiko ng pamahalaan na sumunod sa health protocols, tiyakin na may booking o ticket sa biyahe at alamin ang pagbabago sa schedule ng biyahe at safety rules.
