Sinopla ni Foreign Affairs Secretary Alan Peter Cayetano si Vice President Leni Robredo matapos umanong magbigay ito ng “double standard” na komento hinggil sa naging aksyon ng philippine gov’t sa problema nito sa bansang Kuwait.
Matatandaang kamakailan lamang sinabi ni Robredo na dapat na tanggapin at aminin ng pamahalaan ang mga naging pagkakamali sa nangyaring krisis upang maibsan ang diplomatic tension sa pagitan ng dalawang bansa.
Ayon kay Cayetano, sinisiguro niya sa Bise Presidente na kanyang aakuin ang lahat ng responsibilidad at pananagutan sa mga di inaasahang pangyayari sa Kuwait ngunit hindi aniya palalampasin ang naging double standard statement nito.
Giit ni Cayetano, malinaw sa mga pahayag ni Robredo na binabatikos niya ang administrasyon dahil sa nilabag daw ng pamahalaan ang soberenya ng Kuwait matapos maglunsad ng operasyon doon para sagipin ang mga OFWs na inaabuso ng kanilang mga employer.
Bwelta ng DFA official, ang mga pakikilahok sa mga demonstrasyon ni Australian Missionary Sis. Patricia Fox ang tunay na halimbawa ng paglabag sa soberenya ng isang bansa dahil sa harap-harapan na nitong pinanghihimasukan ang usaping panloob ng Pilipinas.
Ngunit imbes na batikusin aniya si Fox, ipinagtanggol pa ito ni Robredo at ng kanyang mga kaalyado sa liberal party.
