SPORTS

Inihayag ng kampo ni world heavyweight boxing champion Anthony Joshua ng Britanya na handa itong lumaban nang walang manonood nang live sa paligid ng boxing ring.

Ginawa ni promoter Eddie Hearn ang pahayag matapos sabihin ng British Boxing Board of Control (BBBC) na posibleng magkaroon ng professional boxing events simula sa Hulyo nang walang ringside viewers bunsod ng COVID-19 pandemic.

Maliban dito, plano ring limitahan ang event ng hanggang limang laban lamang dahil sa social distancing.

Ang susunod sanang laban ni Joshua ay sa Hunyo 20 kontra Bulgarian Kubrat Pulev pero hindi rin naman ito matutuloy dahil sa krisis.

Matatandaang nabawi ni Joshua ang kanyang IBF, WBA, WBO at IBO belts mula kay Mexican-American Andy Ruiz Jr. sa Saudi Arabia noong December 2019.

Inihayag ni Los Angeles Lakers superstar LeBron James na handa na siya sa pagbabalik ng National Basketball Association (NBA) sa kabila ng umano’y panawagan ng ilang agents at team executives na kanselahin na ang 2019-20 season.

Matatandaang itinigil ng NBA ang mga laro noong Marso 12 matapos magpositibo sa coronavirus disease 2019 (COVID-19) si Rudy Gobert ng Utah.

Una nang ibinalita ng CNBC na nangangamba umano ang ilang team owners sa laki ng posibleng mawala sa kanila kapag itinuloy ang balak na pagkakaroon ng laro sa isang ‘empty arena’ at ipakita ito sa television audience.

Ngunit itinanggi ito ni James sa pagsasabing handa siya at ang team na tapusin ang kasalukuyang season.

Gigil nang makasagupa ni WBO bantamweight champion John Riel Casimero sa isang triple world title bout ang Japanese superstar na si Naoya Inoue.

Unang itinakda ang unification fight ng dalawang boksingero ngayong buwan pero dahil sa coronavirus pandemic ay inilipat ito sa Hulyo.

Iginiit naman ni MP Promotions president Sean Gibbons na magkakaharap din ang dalawang kampeon sa takdang panahon.

Sinasabing may ibang gustong iharap si Top Rank Inc. executive Bob Arum kay Casimero pero hindi umano interesado rito ang kampo ng Pinoy boxer.

Sa Belgrade, Serbia na gaganapin ang 2021 Men’s World Boxing Championships at hindi sa New Delhi, India.

Ito’y ang inanunsiyo ng International Boxing Association (AIBA) matapos kanselahin ang kontrata ng New Delhi dahil sa umano’y hindi pagbabayad ng napagkasunduang host fee.

Gayunman, ayon sa AIBA, magbabayad pa rin ang India ng cancellation penalty na nagkakahalaga ng $500,000 o 461,366 euros.

Samantala, wala pang eksaktong petsa kung kailan magaganap ang nabanggit na boxing competition dahil sa coronavirus pandemic.

Hindi pa man nakakaarangkada sa NBA G-League dahil sa coronavirus pandemic, napapansin na umano ng ilang coaches ang husay at galing ni Filipino-American Jalen Green.

Ayon kay Indiana Pacers assistant coach Bill Bayno, mentor ng Talk ‘N Text noong 2002, tiyak na malayo ang mararating at magiging maliwanag ang kinabukasan ng batang manlalaro.

Magugunitang mas piniling pasukin ni Green ang NBA G-League sa halip na sumabak sa collegiate basketball.

Sa isang online coaching seminar, sinabi ni Bayno na nararamdaman niyang makakalusot si Green sa Top 10 pick sakaling magpasya na itong pumasok sa NBA.

Sinasabing ang ama ni Green ay isang Amerikano habang taga-Ilocos Sur naman ang kanyang ina.

Muling itinanghal bilang Coach of the Year ng PBA Press Corps ang mentor ng San Miguel Beermen na si Leo Austria.

Sinasabing ang awards night ay itinakda sana noon pang Marso 16 sa Novotel Manila sa Araneta Center pero na-postpone ito dahil sa coronavirus pandemic.

Dahil dito, hindi pa alam kung kailan makukuha ni Austria ang Virgilio “Baby” Dalupan trophy para sa naturang parangal.

Ito na ang ika-apat na Coach of the Year award ni Austria sa loob ng limang taon.

Pasok ang ilang Filipino mixed martial artists sa listahan ng mga pinagpipilian para sa world rankings ng One Championship.

Kasama sa strawweight mixed martial arts list si Joshua Pacio habang nasa ikatlong puwesto ang isa pang Pinoy na si Rene Catalan at pang-lima naman si Lito Adiwang.

Sa flyweight, nakapasok sina Danny Kingad at Reece McLaren habang nasa bantamweight naman si Kevin Belingon.

Samantala, sa women’s atomweight ng MMM, nasa ikalawang puwesto ang Pinay na si Denice Zamboanga habang pang-lima naman si Gina Iniong.

Ilalabas naman ng ONE Championship ang official athlete rankings kapag natapos na ang pagsusuri na gagawin ng independent panel.

Pinaplantsa na ng Top Rank ang posibleng welterweight showdown sa ring nina unbeaten American Terence Crawford at ni boxing champ Manny “Pacman” Pacquiao.

Ito ang kinumpirma ni Top Rank chief executive Bob Arum, may mga tentative talks o mangilan-ngilang pag-uusap na aniyang ginawa ang pamunuan kaugnay sa labang Pacquiao-Crawford sa ring bago pa man masuspinde ang lahat ng mga sporting events dahil sa banta ng coronavirus disease 2019 (COVID-19) pandemic.

Dagdag pa ni Arum, magaganap sana ang naturang laban sa ring bago matapos ang taong ito.

Kanselado ang triple bantamweight title unification bout sa pagitan nina Pinoy John Riel Casimero at Japanese Naoya Inoue bukas, Abril 25, dahil sa coronavirus disease 2019 (COVID-19) pandemic.

Ayon kay Top Rank Inc. Chief Bob Arum, kasalukuyang nasa Las Vegas si Casimero habang apektado naman ng krisis Sa Japan si Inoue.

Plano naman ni arum na papuntahin si Casimero sa Tokyo at doon na lamang ikasa ang laban.

Wala pang pahayag ang magkabilang panig ukol sa naturang usapin.

Suportado ng maraming grupo ang paglipat ni Pinoy Boxer Eumir Marcial sa professional division.

Ayon kay National Boxing Coach Nolito Boy Velasco walang magiging problema sa pagiging professional boxer ni Marcial bastat payagan lamang ito ng kaniyang manager na maglaro rin sa Olympics.

Sakaling nais ni Marcial na maging pro boxer sinabi ni Velasco na dapat itong umrima ng kontrata na papayagan muna ito na magkaruon ng tune up fight bago ang pagsabak sa Olympics.

Mabgugunitang ilang boxing promotoers tulad ng mp promotions ni Senador Manny Pacquiao ang interesadong makuha si marcial para maging pro boxer ito.