RONDA PROBINSYA

Aabot sa 7K pamilya ang apektado ng flashflood sa ilang Bayan ng Isabela dahil sa walang tigil na malakas na pag-ulan dulot ng Hanging Habagat.

Ayon sa Department of Social Welfare and Development (DSWD-Region 2) , kabilang sa binaha ang San Manuel kung saan, nasa 5K pamilya ang apektado.

Nasa 2K pamilya naman ang binaha sa Aurora dahil parin sa walang tigil na pag-ulan kahapon.

Sa pahayag ni DSWD Regional director Cezario Joel Espejo, namahagi na ang kanialang ahensya ng family food packs at ₱3,000 na ayuda alinsunod na rin sa Assistance to Individuals in Crisis Situation Program ng ahensya.

Samantala, nagpaliwanag naman ang National Irrigation Administration-Magat River Integrated Irrigation System (NIA)-MARIIS Division III at sinabi na ang pagbaha ay hindi dulot ng operasyon ng Magat Dam kundi resulta umano ng tatlong oras na pag-ulan.

Nanawagan sa mga residente ang Zamboanga LGUs na paigtingin ang kanilang pagbabantay sa kanilang mga alagang baboy dahil laganap parin ang African Swine Fever (ASF) sa kanilang lugar.

Ayon kay Office of the City Veterinarian (OCVET) chief, Dr. Mario Arriola, batay sa monitoring ng Department of Agriculture (DA), infected o nananatili pa ring nasa red zone classification ng naturang sakit ang kanilang lungsod.

Sinabi ni Arriola na nasa 27 barangay ang tinamaan ngayon ng naturang sakit kabilang na dito ang Tumaga, San Roque, Manicahan, Curuan, Vitali, Ayala, at Culianan.

Sa datos ng OCVET, nasa 2,977 na ang naapektuhan ng sakit habang 872 na ang pinatay na baboy sa nakaraang pitong araw.

Dahil dito, pinayuhan ni Arriola ang publiko na kaagad na iulat sa Office of the City Veterinarian sakaling tamaan ng sakit o nangamatay ang kanilang alagang baboy.

Nareskyu ang 16 na pasahero makaraang lumubog ang bangkang kanilang sinasakyan sa karagatang sakop ng San Pascual, Masbate.

Ayon sa ng mga tauhan ng Philippine Coast Guard (PCG), galing Camarines Sur  at papunta sana sa Barangay San Jose sa San Pascual na bahagi ng Burias Island ang bangkang sinasakyan ng mga pasahero nang maganap ang insidente.

Base sa imbestigasyon, sinalubong ng malakas na ulan at sinabayan pa ng malakas na hangin at malalaking alon ang kanilang bangka dahilan kaya tumaob at lumubog ito.

Ayon sa mga nareskyu, tatlong oras silang nagpalutang-lutang sa karagatan bago sila nailigtas ng mga mangingisdang dumaan sa nabanggit na lugar.

Sa ngayon, dinala muna sa Munisipyo ng San Pascual ang mga nailigtas bago ihatid sa kani-kanilang lugar.

Arestado ang siyam na indibidwal makaraang magsagawa ng operasyon ang mga otoridad sa Barangay Guitnang Bayan II, Antipolo Rizal.

Aabot sa mahigit P403, 000 halaga ng shabu ang nasabat ng mga Anti-Narcotics agents mula sa mga drug suspect sa dalawang operasyon na ikinasa nito lamang sabado at linggo.

Kinilala ang mga suspek na sina Reden Delas Armas; Catherine Niegas; Benjie Poliquit; Armin Diaz; at Bernie Doria na nahuling nagbebenta ng shabu.

Nakumpiska sa mga suspek ang 15 plastic sachet ng shabu na may timbang na aabot sa 50 gramo na tinatayang nagkakahalaga ng P340, 000.

Ayon sa mga otoridad, si Delas Armas ay miyembro umano ng isang Criminal Syndicate at kasama rin sa Drug watch list ng PNP bilang isang High-Value Individual (HVI).

Samantala, arestado din sa isang operasyon ang suspek na sina Charlie Estabilla; Romeo Dominador; Richard Saysay; at Rickrod Gegania sa Barangay Sta. Cruz na nakuhanan naman ng 15 gramo ng methamphetamine na tinatayang nagkakahalaga ng P103, 500.

Nakakulong na ngayon ang mga suspek at nahaharap sa paglabag sa Republic Act 9165 o Comprehensive Dangerous Drugs Act of 2002.

Bumuo na ng special investigation task group (SITG) ang Philippine National Police para tumutok sa imbestigasyon sa pagpatay sa tserman ng Barangay Anurturu sa Rizal, Cagayan.

Ayon kay PNP chief Gen. Rodolfo Azurin Jr., binuhay ang SITG matapos ang pamamaril sa biktimang si Roberto de Ocampo.

Sa inisyal na pagsisiyasat, lulan ng motorsiklo si de Ocampo nang pagbabarilin ng mga nakamotorsiklong salarin sa Barangay Gumarueng sa bayan ng Piat.

Sugatan naman sa insidente ang kanyang asawa na si Leonora.

Nabatid na nire-review na rin ng pulisya ang mga kuha ng mga CCTV camera sa lugar kung saan tinambangan si de Ocampo.

Tumama ang Magnitude 4 na lindol sa  Bayan ng Merida sa Leyte kaninang ala- 6:49 ng umaga.

Ayon sa PHIVOLCS, natukoy ang sentro ng lindol sa layong limang kilometro, hilagang-kanluran ng Bayan ng Merida.

Tectonic ang pinagmulan ng pagyanig at may lalim na 22 kilometro mula sa episentro.

Naramdaman naman ang Intensity 2 sa mga Bayan ng Albuera at Calubian sa nabanggit na lugar.

Wala namang inaasahang aftershocks habang wala ring naitalang pinsala at mga nasaktan sa naturang lindol.

Patay ang dating Vice Mayor ng Lobo, Batangas at kasalukuyang Sangguniang Bayan Secretary matapos pagbabarilin habang nagtatalumpati sa isang party.

Kinilala ng mga awtoridad ang biktma na si Romeo Sulit na nagsasalita pa sa Barangay Tayuman nang lapitan siya ng gunman at barilin sa ulo.

Agad namang nakatakas ang gunman na may kasama pang look-out sakay ng motorsiklo.

Isinugod pa sa ospital ang biktima pero binawian din ng buhay.

Wala namang nababalitaan ang mga kamag-anak ng biktima na nakaalitan nito para gawin ang karumal-dumal na krimen.

Patuloy ang imbestigasyon ng mga awtoridad para malaman ang motibo sa krimen at pagkakakilanlan sa mga salarin.

Tinatayang aabot sa 400 kilograms ng shabu na nagkakahalaga ng P2.72 billion, ang nasabat ng Philippine Drug Enforcement Agency sa buy-bust operation sa Pangasinan at La Union.

Ayon kay PDEA Director General Wilkins Villanueva, naka-pack pa ang mga pakete na mayroong label na Chinese Tea.

Unang nasabat ng mga otoridad sa  Pozorrubio, Pangasinan ang 360 kilograms ng shabu mula sa isang Chinese national at iba pa nitong kasamang Pilipino, habang sa follow-up buy-bust operation sa San Fernando, La Union nakuha ang 40 kilograms mula kay Romel Leyese at John Paul Repuesto.

Nanguna sa operasyon ang PDEA Intelligence Service katuwang ang PDEA RO 1, PDEA NCR, AFP Task Force Noah, AFP Team Navy, Bureau of Customs, at Philippine National Police.

Sa ngayon, inihahanda na ng mga otoridad ang kasong isasampa sa mga suspek dahil sa paglabag sa Republic Act 9165 o Comprehensive Dangerous Drugs Act of 2002.

Sumampa na sa 9, 836 pamilya ang naapektuhan ng pagbaha sa Maguindanao.

Ito ay matapos umapaw ang ilog ng Rio Grande de Mindanao bunsod ng naranasang malakas na pag-ulan.

Ayon sa Balumol Kadiding, opisyal mula sa Municipal Disaster Risk Reduction and Management, kabilang sa naapektuhan ang Barangay Batungkayo, Bulit, Bulod, Dungguan, Limbalod, Maraidagao, Nabundas, Pagagawan, Talapas, at Talitay.

Pero nakauwi na ang mga residente na nakatira sa nabanggit na lugar matapos tuluyan nang humupa ang baha.

Dalawang bahay malapit sa ilog ang nasira ng baha kung saan maraming pananim ang napinsala.

Patuloy naman ang pamamahagi ng food packs ng LGU sa mga apektadong residente.

Patay ang isang lalaki sa Talaingod, Davao del Norte matapos matabunan ng lupa ang kanilang bahay.

Kinilala ng Provincial Disaster Risk Reduction and Management Office ng Davao del Norte ang biktima na si Liloy Linsagan.

Sugatan naman ang asawa nito na si Evelyn Linsagan na nagpapagamot na ngayon sa ospital sa Bayan ng Kapalong.

Nabatid na aabot sa anim  na bahay ang nasira ng landslide dahil sa malakas na ulan, pero ang bahay ng mag-asawa ang pinaka-apektado.

Nananatili na ngayon sa Evacuation Center ang ilang residente na nasiraan ng bahay.