RONDA PROBINSYA

Kasunod sa pagkamatay ng isang Philippine Eagle ilang oras lamang matapos itong sagipin sa Compostela, Davao de Oro, nanawagan ang Philippine Eagle Foundation (PEF) sa pamahalaan na magpatupad ng mas mahigpit na mga hakbang sa pagprotekta sa mga agila.

Batay sa imbestigasyon, posibleng nasugatan ang naturang agila matapos barilin ng holen.

Namatay ito makalipas ng ilang oras dahil sa severe blood loss.

Ayon sa ulat, kabilang ang air gun sa mga karaniwang ginagamit na pambaril sa mga agila.

Ikinalungkot naman ni PEF Director for Operations Dr. Jayson Ibañez ang insidente at sinabing sa kabila ng kanilang pagsisikap na alagaan ang critically endangered na Philippine Eagle, patuloy pa rin silang nasasangkot sa karahasan.

Hinihikayat naman ng PEF ang mga lokal na pamahalaan na magpatupad ng mga ordinansa na magkokontrol sa pagmamay-ari ng air guns sa mga teritoryo ng agila.

Makatatanggap ng P500,000 pabuya ang sinumang makapagbibigay impormasyon sa kinaroroonan ng murder suspect na si Asnawi “Jojo” Limbona, ang umano’y mastermind sa pamamaril noong January 2, 2024, sa Brgy. Rosary Heights 2, Cotabato City kung saan target ang alkalde na nagresulta sa pagkamatay ni PSSgt. Zahraman Mustapha Dicolano.

Sa panayam kay Datu Odin Sinsuat, Maguindanao del Norte Mayor Lester Sinsuat, nag-ambagan sina Barangay Captain Loaykeit Sinsuat at ang community leaders upang mabuo ang pabuya para sa makakapagturo ng kinaroroonan ni Jojo Limbona.

Iginiit rin ni Mayor Sinsuat, existing pa rin ang arrest warrant na inilabas noong May 6, 2024, ng Cotabato City Regional Trial Court Branch 13 laban sa akusadong si Limbona at tatlong iba pa sa kasong murder na may Case No. 2024-C-15040 kung saan nagpalabas ang RTC Branch 13 ng warrant of arrest laban sa mga akusado.

Sa isinagawang press briefing sa Camp Crame, sinabi ni PNP Public Information Office Chief, PCol. Jean Fajardo na batay sa ulat ng Police Regional Office Bangsamoro Autonomous Region (PRO-BAR) ay hawak pa rin nila ang warrant of arrest na inilabas ng korte laban kina Limbona at tatlong iba pa.

Sa katunayan aniya, itinuring na ng PRO-BAR si Limbona bilang “Most Wanted Person” dahil sa kasong murder na isang non-bailable offense.

Nanawagan din si Fajardo sa publiko na ipagbigay-alam sa awtoridad ang posibleng kanyang kinaroroonan.

“We will make sure that your identity will remain confidential, at itong reward ay talagang ibinibigay natin dahil napakalaking tulong. It’s not all about money kundi iyong malasakit po nila sa kanilang kapwa tao at ang ating hangarin na mabigyan hustisya itong mga naging biktima,” sabi ni Fajardo.

Nagbabala rin si Fajardo sa mga tumutulong at nagkakanlong kay alyas Jojo Limbona na may posibilidad na maharap ang mga ito sa kasong obstruction of justice.

Nabatid na isang buwan matapos lumabas ang arrest warrant ay nananatiling ‘at large’ si Limbona at tatlong iba pang akusado sa kasong murder.

Pormal nang kinasuhan ng isang animal welfare group ang mga suspek na sangkot sa pagpatay sa isang aso sa Pilar, Capiz.

Matatandaang nag-viral kamakailan sa social media ang video ng brutal na pagpatay sa aso kung saan inilambitin ito sa basketball ring at paulit-ulit na pinaghahampas.

Ayon sa social media post ng Capiz Animal Welfare Advocates Inc., sinampahan nila ng kasong paglabag sa Republic Act No. 8485 o Animal Welfare Act ang apat na suspek, kabilang na ang amo ng aso.

Umaasa ang naturang animal welfare group na magsisilbi ang kanilang naging hakbang bilang wake-up call para sa animal abusers at iresponsableng pet owners.

Binawian ng buhay ang isang aso matapos ilambitin sa basketball ring at paghahampasin ng ilang residente sa Pilar, Capiz.

Batay sa kuha ng video, hawak ng isang lalaki ang taling nakakabit sa aso.

Ilang sandali lamang, may isa pang lalaking lumapit sa aso at walang-awang pinaghahampas ito gamit ang isang malaking kawayan.

Napag-alamang mismong Sangguniang Kabataan (SK) Chairman ng barangay ang humampas sa aso hanggang sa tuluyan itong mamatay.

Paliwanag niya, nanghingi ng tulong sa mga residente ang amo ng aso dahil kumakain umano ito ng mga alagang manok at iba pang maliliit na hayop.

Kinondena naman ng ilang animal welfare groups ang brutal na pagpatay sa aso at kinumpirmang handa silang magsampa ng kaso laban sa SK Chairman at sa mga sangkot sa nangyaring krimen.

UMARANGKADA na ang manhunt operations ng Philippine National Police (PNP) laban sa itinuturong mastermind at tatlo pang kasabwat sa pamamaril kay Datu Odin Sinsuat Mayor Lester Sinsuat noong Enero 2.

Kasunod ito ng pag-isyu ng Cotabato City Regional Trial Court Branch 13 ng Warrant of Arrest laban kay Ansawi Limbona, alyas Jojo Limbona, dahil sa kasong murder, pati na rin sa tatlo pang kasama niya.

Pahayag ni PNP Public Information Office Chief, PCol. Jean Fajardo, hindi tumitigil ang Datu Odin Sinsuat Municipal Police Station sa paghahanap upang madakip ang target na suspek at mga kasamahan nito sa lalong madaling panahon.

Dagdag ni Fajardo, dahil nabigo ang pulisya sa unang pagtatangka na maisilbi ang warrant laban kay Limbona, ibabalik muna ito sa Korte at hihintayin ang paglalabas ng alias warrant of arrest para sa kaso, na isang non-bailable offense.

Sa insidente ng pamamaril ng grupo ni Limbona, nasawi ang police escort ni Mayor Sinsuat na si PSSgt. Zahraman Mustapha Dicolano.

Dahil dito, hinikayat ni Fajardo ang publiko na magbigay ng impormasyon ukol sa kinaroroonan ni Limbona at ng kanyang mga kasapakat upang agad malutas ang kaso.

Si Jojo Limbona, dating Board Member ng Maguindanao at asawa ng kasalukuyang Chancellor na si Hejira Nefertiti Mcalandong Limbona ng isang unibersidad sa Mindanao, ay nahaharap din sa reklamo sa Ombudsman dahil sa umano’y paggamit ng kagamitan at koneksyon ng paaralan sa panggigipit sa Brgy. Ambolodto, Datu Odin Sinsuat.

Sugatan ang 43 katao matapos mahulog ang kanilang sinasakyan jeepney sa gilid ng kalsada sa San Roque, Enrile, Cagayan.

Napag-alaman na galing sa isang kasalan sa Tumauini, Isabela ang naturang jeep at pauwi na sana sa bayan ng Enrile nang maganap ang aksidente.

Ayon sa tsuper ng jeep, nawalan ng kontrol ang driver ng jeep at nahulog sa gilid ng kalsada.

Agad namang dinala sa pagamutan ang mga sugatang sakay ng jeepney.

Overlading ang nakikitang dahilan ng pagkahulog ng jeep sa bangin na nasa 3-5 feet ang lalim.

Nagpaabot na rin ng agarang tulong ang local government unit ng nasabing bayan para sa medical assistance para sa mga biktima

Himas rehas ang tatlong lalaki sa Iligan City dahil sa brutal na pagpatay sa isang asong Pinoy o aspin.

Nakuhaan pa ng video ang mga lalaki na nakangiti habang kinakaladkad ang nakataling aso sa motorsiklo.

Nadakip ang mga ito matapos iulat ng isang concerned citizen ang nangyaring krimen.

Ayon sa mga pulis, intensyon ng mga suspek na patayin ang aso.

Idinala ang tatlong lalaki at ang mga labi ng aso sa Iligan City Police Station 1 para sa dokumentasyon at wastong disposisyon.

Mahaharap ang mga suspek sa kasong paglabag sa Republic Act No. 8485 o Animal Welfare Act of 1998.