NATIONAL NEWS

Nanawagan ang palasyo sa mga drayber at operator ng Public Utility Jeepney (PUJ) na iurong ang planong tigil-pasada ngayong linggo sa kabila ng walang tigil na pagtaas ng presyo ng langis sa gitna ng COVID-19 pandemic.

Ayon kay Presidential Communications Operations Office (PCOO) Secretary Martin Andanar, ginagawa ng pamahalaan ang lahat ng kanilang makakaya para tulungan ang mga nasabing indibidwal.

Aniya, patuloy pa rin ang implementasyon ng fuel subsidy program na kung saan nasa 180,000 operators na ang nakatanggap ng ayuda batay sa huling tala noong Hunyo a-primero ng Land Transportation Franchising and Regulatory Board (LTFRB).

Nabatid na nasa 70 piso hanggang 80 piso ang presyo ng kada litro ng langis.

Nilinaw ng Philippine Amalgamated Supermarkets Association (PAGASA) na ang pagtaas ng presyo ng mga bilihin ay bunsod ng ilang taong COVID-19 lockdowns at giyera sa pagitan ng Russia at Ukraine.

Dahil dito, sinabi ni PAGASA President Steven Cua sa panayam ng DWIZ na humina ang demand at tumaas ang cost of production ng mga manufacturer.

Dagdag pa ni Cua na ang Department of Trade and Industry (DTI) sa loob ng mahigit 20 taon ay mayroong konseho na tinawag na National Price Coordinating Council na nakabantay sa pagtaas ng presyo ng mga bilihin.

Kasado na ang Davao Defense System para sa gaganaping inagurasyon ni incoming Vice President Sara “Inday” Duterte.

Ayon kay Davao City Police Major Maria Teresita Gaspan, bahagi ito ng kanilang paghahanda para masiguro ang kaayusan at kapayapaan sa mismong araw ng panunumpa ni Vice President Sara Duterte.

Isang tactical at operational strategy ani Gaspan ang Davao Defense System na magpapalakas at magpapaigting sa mga inilatag nilang checkpoint sa mga tri-borders ng Davao City.

Kailangan aniyang inspeksyunin ang lahat ng mga sasakyan at pasahero na papasok at palabas syudad.

Una nang sinabi ni Gaspan, na aabot sa 2K police personnel ang kanilang ipakakalat sa Davao sa mismong araw ng oathtaking ni VP Sara “Inday” Duterte.  -  sa ulat ni Jopel Pelenio (Patrol 17)

Hinimok ng National Disaster Risk Reduction and Management Council (NDRRMC) at ng Office of Civil Defense ang publiko  na makiisa sa gaganaping 2nd quarter Nationwide Simultaneous Earthquake Drill (NSED) sa Huwebes ganap na alas nuebe ng umaga bilang paghahanda sa panganib dulot ng paglindol.

Sa pamamagitan ng isinagawang Disaster Preparedness webinar ng ahensya ngayong araw inisa-isa dito ang kahalagahan ng pagiging handa at mga dapat gawin bago, habang, at pagkatapos ng mga sakuna gaya ng lindol.

Ayon kay Asian Disaster Preparedness Center Program Officer  Mr. Edwin Salonga mahalaga na maintindihan kung ano ang mga panganib para magawa ang mga paghahandang dapat gawin.

Sinabi naman ni Civil Defense Assistant Secretary Hernando Macaraig higit na mahalaga na maisabuhay ang mga kaalaman sa paghahanda sa panahon ng mismong sakuna.

Nabatid na isinagawa ang 1st quarter ng NSED nitong Marso at  apat na beses itong ginaganap sa loob ng isang taon bilang paghahanda sa panganib na dulot ng  lindol. – sa ulat ni Tina Nolasco (Patrol 11)

Nasa 272 million pesos ang nagastos ng Partido Federal ng Pilipinas (PFP), ang partidong politikal ni President-elect Ferdinand “Bongbong” Marcos Jr. sa nagdaang eleksyon 2022.

 Ito ang inihayag ni PFP General Counsel Attorney George Briones base sa Statement of Contributions and Expenditures (SOCE).

 Aniya, ang nasabing halaga ay below the maximum expenditure na 337 million pesos na pinapayagan ng batas para sa national political party.

 Ang 400 pahina ng SOCE na inihain ng Commission on Elections (COMELEC) ngayong araw ay nilagdaan ng PFP National Treasurer na si Anton Lagdameo, na napili ni Bongbong na maging Special Assistant to the President (SAP) sa ilalim ng kaniyang administrasyon.

Sa ilalim ng Republic Act 7166 section 14, ang lahat ng kandidato at treasurer ng political party ay dapat na maghain ng SOCE sa loob ng 30 days matapos ang eleksyon.

Inihayag ng National Telecommunications Commission (NTC) na inaasahang magsisimula ang Elon Musk Starlink, isang internet service provider sa Pilipinas sa ikaapat na kwarter ng taong kasalukuyan.

 Sa panayam ng DWIZ, sinabi ni NTC Commissioner Edgardo Cabarios na tuloy-tuloy ang improvement ng satellite technology na kung saan ang gagamitin ng Starlink ay latest technology.

 Nilinaw naman ni Cabarios ang mga inilatag na alituntunin para makapag-operate ang Starlink sa Pilipinas.

Inihayag ni Health Secretary Francisco Duque III na kukumbinsihin nito ang susunod na administrasyon hinggil sa pananatili ng COVID-19 face mask rule.

Aniya, kahit na ang papasok na administrasyon ang gagawa ng sarili nitong COVID-19 protocols ay kailangan pa rin ang mga nagawa ng outgoing administration kaugnay sa pandemic response.

Nabatid na ang face mask requirement ay mananatili lamang hanggang sa huling araw ng pamamahala ni Pangulong Rodrigo Duterte.

Inilatag ng Department of Agrarian Reform (DAR) ang kanilang nakahandang plano ipang maisakatuparan ang pangako ni incoming President Ferdinand ‘Bongbong’ Marcos Jr. na maging 20 pesos per kilo ang presyo ng bigas.

 Ayon kay DAR Undersecretary David Erro, para bumaba ang presyo ng bigas kanilang imumungkahi sa susunod na administrasyon ang pag-mechanize ng mga palayan upang madagdagan ang produksyon ng palay at tumaas din ang suplay nito.

 Ani ni Erro, ang pag-mechanize ng 150,000 hectares na lupain ay makakapag-produce ng 23 milyong kaban ng bigas.

 Sinabi naman ni DAR Sec. Bernie Cruz, na dapat mapag-usapan agad ang proposal sa paparating na administrasyon upang makita na agad ang 20 pesos per kilo na bentahan ng bigas sa 2023.

Inihayag ng US government na bibisita sa Pilipinas si US Deputy Secretary of State Wendy Sherman upang makipagkita kay President-elect Ferdinand Marcos Jr.

 Ayon sa pahayag, ang pagpunta ni Sherman sa Pilipinas ay bahagi ng kanyang pagdalaw sa rehiyon.

 Mababatid na si Sherman ang magiging pinakamataas na opisyal ng Estados Unidos na pupunta sa bansa matapos ang 2022 elections.

 Samantala, bukod kay Marcos ay makikipagkita rin si Sherman sa mga opisyal ng papasok at papaalis na administrasyon upang pag-usapan ang pagpapatibay ng alyansa ng Estados Unidos at Pilipinas.

Inihayag ng Philippine National Police (PNP) na wala pang inilabas na permit ang mga Local Government Unit (LGU) para sa anumang protesta sa araw ng inagurasyon nina President-elect Ferdinand “Bongbong” Marcos Jr. at Vice President-elect Sara Duterte.

 Ayon kay PNP Director for Operations Police Major General Valeriano de Leon, sisiguraduhin ng civil disturbance management ng PNP na hindi makakalapit ang mga ilegal na rally sa kaganapan para magambala ang proseso ng oath-taking.

 Sinabi naman ni Manila Police District Chief Police Brigadier General Leo Francisco, na nasa 7,000 hanggang 8,000 na pulis ang ipapakalat upang masigurado ang seguridad ng inagurasyon ni Marcos sa National Museum of the Philippines (NMP) sa Hunyo a-30.

 Samantala, inihahanda na ang San Pedro Square sa Davao City para naman sa inagurasyon ni Sara Duterte sa Hunyo a-19.