FEATURES

Arestado ang isa sa dalawang suspek sa pangangarnap at tangkang pagpatay sa isang carpool driver na binigti at pinagsasaksak sa loob ng minamaneho nitong van sa Valenzuela City.

Kinilala ang suspek na si Diomedes Saquillo Jr., habang pinaghahanap pa ang kasama nito na kinilala lang sa alyas na “Migs”.

Ayon sa Valenzuela City Police, nag-‘book’ umano ang mga suspek sa ‘carpool’ mula sa lalawigan ng Quezon patungong Valenzuela City at nang makarating sa pick-up location ang drayber ay ibinigti ito ng mga suspekn at pinagsasaksak.

Nagpanggap naman ang biktima na patay na kaya dinala siya at basta na lamang iniwan ng mga suspek sa isang liblib na lugar sa San Pedro, Laguna at tinangay ang kanyang sasakyan.

Natunton ng mga otoridad sa Taguig City si Saquillo na nagresulta sa pagkakaaresto sa kanya sa pamamagitan ng pagprisinta ng nasabing warrant of arrest.

Nabatid na narekober kay Saquillo ang susi ng sasakyan ng biktima, samantala, pinaghahanap pa ngt mga otoridad ang isa pang suspek. —sa panulat ni Mara Valle

Nasawi ang isang lalaking person with disabitiy (PWD) sa sunog sa Valenzuela City.

Ipinabatid ng Bureau of Fire Protection na nagsimula ang sunog alas-3 kaninang madaling araw at umaabot sa unang alarma bago tuluyang naapula makalipas ang halos isang oras.

Ayon sa BFP Valenzuela, nagsimula ang sunog sa isang vulcanizing shop na katabi ng bahay ng biktima.

Patuloy ang imbestigasyon ng BFP Valenzuela sa sanhi ng apoy sa naturang lugar. —sa panulat ni Kim Gomez

Patay ang isang binatilyo matapos saksakin ng isang grupo ng kabataan sa Tondo, Manila.

Kinilala ang biktima na si Raymond Romasanta, isang studyante na nagtamo ng mga saksak sa katawan na sanhi ng kanyang agarang pagkamatay.

Ayon sa mga otoridad, naglalakad ang biktima kasama ang isang kaibigan nang harangin at komprontahin ng grupo rin ng kapwa nilang kabataan at ilang sandali pa sinaksak na ang biktima.

Nadakip na ang tatlo sa mga menor-de-edad na sangkot sa pangyayari.

Patuloy pa ang isinasagawang imbestigasyon ng mga pulis sa insidente. —sa panulat ni Kim Gomez

Kalaboso ang apat na lalaki matapos mahulihan ng hinihinalang shabu ng mga tropa ng Southern Police District (SPD) sa Manila.

Kinilala ang mga suspek na sina Marco Anthony Panibe, 30 anyos; Romnick Misloso, 22 anyos;  Ernesto Landing, 25 anyos; at Dreyven Aubrey Vilasco, 21 anyos.

Nasamsam sa mga suspek ang mahigit sa 500 gramo ng shabu na nagkakahalaga ng 3.4 na milyong pisong halaga.

Nahaharap ang mga suspek sa kasong paglabag sa RA 9165 o ang comprehensive dangerous drug act of 2002. —sa panulat ni Kim Gomez

Patay ang isang security guard matapos maengkwentro ang mga tauhan ng Manila Police District (MPD) habang nakatakas naman ang kaniyang kasama sa Manila.

Kinilala ang suspek na si Ernesto Onora, 46 anyos.

Ayon sa mga otoridad, nakatanggap ng ulat ang mga pulis patungkol sa presensiya ng dalawang lalaki na sinasabing sangkot umano sa serye ng pangho-holdap sa mga convenience store.

Tinungo ng mga operatiba ang area kung saan namataan sila ng mga suspek kaya biglang humarurot patakas subalit nabangga sa gutter na ikinabagsak nila. Bago pa malapitan ng mga operatiba ay nagpaputok si Onora sa direksyon ng mga pulis na nauwi sa palitan ng mga putok ng baril.

Sa ngayon, pinaghahanap at inaalam pa ng mga pulis ang pagkakakilanlan nakatakas na kasama nito. —sa panulat ni Kim Gomez