Sasailalim sa balasahan ang Bureau of Customs o BOC upang tuluyan nang matuldukan ang katiwalian at matigil ang ‘suki system’.
Binalaan ni Customs Commissioner Isidro Lapeña ang mga empleyado sa Aduana na masisibak sila sa trabaho sa oras na mapatunayang sangkot sa katiwalian.
Ayon kay Lapeña, kung inaakala ng mga tiwaling opisyal at empleyado na nakaligtas sila noong isang taon, nagkakamali sila ngayon dahil tiyak na malalagas sila sa pagkakataong ito.
Ito lamang aniya ang paraan upang matuldukan o kaya ay mabawasan ang tradisyon ng korapsyon sa BOC.
Agosto 30 nang umupo bilang Customs Commissioner si Lapeña kapalit ni dating Commissioner Nicanor Faeldon na sangkot umano sa pagpuslit ng 6.4 billion-peso shabu shipment mula China.
