Judith Estrada-Larino

Nagkasa na ng pag aaral ang DENR para malaman kung may panganib sa kalusugan ang marble toys o holen.

Kasunod na rin ito ng pahayag ng ban toxics na nakakalasan ang holen dahil sa taglay nitong cadmium base na rin sa kanilang sariling pag aaral.

Ayon kay Ban Toxics Campaigner Thony Dizon, dapat mabatid ng publiko ang peligrong dulot ng mga holen na nabibili lang sa mga palengke at maaaring magdulot ng cancer kapag nagkaruon ng exposure rito.

Una nang inihayag ng ban toxics na ang mga holen na sinuri nila ay walang required labeling information na kinakailangan batay na rin sa Republic Act 10620 o Toy and Game Safety Labeling Act of 2013.

Ilang istruktura pa ang inihabol ng Task Force Bangon Marawi matapos maluwagan ang restrictions dulot ng COVID-19 pandemic.

Sinabi ni Task Force Spokesperson Felix Castro na nabinbin ang ilang proyekto sa lungsod dahil nag alisan ang mga manggagawa nuong pandemya na ang iba ay hindi na bumalik kaya’t naghanap pa sila ng bagong tauhan.

Nasa halos isang bilyong pisong pondo pa ng mga proyekto sa Marawi City ang hindi pa naipapatupad bagamat marami na ang naipatayo tulad ng 96 na barangay hall at ilang kalsada

Ayon pa kay Castro, mayroon na ring kuryente sa pinaka apektadong bahagi ng Marawi.

Patay ang hinihinalang rebelde sa ikinasang close air support launching ng militar laban sa umano’y Daulah Islamiyah Group sa Datu Salibo, Maguindanao.

Ayon sa 6th Infantry Division ng Philippine Army, nagsagawa sila ng operasyon matapos isumbong ang mga miyembro ng Daulah Islamiyah-Turaife Group na nangha-harass sa mga komunidad sa Sitio Patawali sa Barangay Ganta.

Kinilala ng mga otoridad ang nasawi na si Sadam Salandang alyas Sadam, umanoy miyembro ng BIFF Karialan Faction sa ilalim ni alyas Robot.

Sinabi ni 6th ID Commander, Lt. Col. Charlie Banaag, nai-turn over na sa local officials ng Datu Salibo ang labi ni Sadam para sa kaukulang paglilibing.

Hawak na ng Philippine Coast Guard (PCG) ang kapitan nang nasunog na MV Mercraft 2 na ikinasawi ng pito katao.

Ayon kay PCG Spokesperson Armand Balilo, isinasailalim na nila sa imbestigasyon si John Lerry Escareces para malaman partikular kung ano ang naging sanhi ng sunog.

Tiniyak ni Balilo ang pagsuri sa lahat ng physical evidence para mabatid ang dahilan ng sunog at matutukan kung mayruong hazardous materials na bitbit ang fast craft.

Hindi naman aniya masyadong luma ang fast craft subalit blangko sila kung fire prone ito dahil gawa ito sa fiber glass subalit pumasa naman sa standards kaya’t maituturing itong sea worthy.

Samantala, kabilang ang ina ng kapitan ng fast craft sa mga nasawi sa aksidente at kinilalang si Charito Escareces, 57 taong gulang at nakaligtas naman ang ama ng kapitan.

Welcome sa Federation of Free Workers (FFW) ang appointment ni Incoming Labor Secretary Bienvenido Laguesma.

Ayon kay Atty. Sonny Matula, pangulo ng grupo, natutuwa silang si Laguesma ang itinalagang kalihim ng DOLE dahil maayos nila itong nakaugnayan nuong mga nakalipas na administrasyon.

Ipinabatid pa ni Matula na maraming pagkakataon na pumapabor si Laguesma sa kapakanan ng mga manggagawa.

Magsasagawa ng konsultasyon sa mga nasa labor sector si Incoming Labor Secretary Bienvenido Laguesma.

Ipinabatid ito ni Laguesma matapos kumpirmahin ang pagtanggap na muling pamunuan ang Department of Labor and Employment (DOLE).

Sinabi ni Laguesma na kailangan muna nilang marinig ang tinig ng mga labor group at maging employers’ group para makabuo at magsulong ng mga solusyon para tugunan ang mga usaping may kinalaman sa paggawa tulad ng contractualization.

Nilinaw ni Laguesma na wala siyang dalang magic wand o quick fix solution sa mga usaping bumabalot o bumabatay sa larangan ng paggawa.

Kasabay nito, dumistansya si Laguesma sa pagkuwestyon kaugnay sa posisyon sa pagtigil muna ng deployment ng OFWs sa Arab countries na kumikilala sa Kafala System na pinapayagan ang employers na tratuhin ang kanilang manggagawa bilang Pseudo Properties.

Hawak na ng Kamara ang mga ballot boxes na naglalaman ng Certificate of Canvass at Election Returns na idiniliver mula sa Senado.

Pasado alas-5 ng madaling araw nang dumating sa Kamara ang mga nasabing ballot boxes sakay ng military trucks at dalawang armored personnel carriers ng AFP.

Mismong si House Sergeant at Arms Retired Police Brigadier General Rodelio Jocson ang sumalubong kay Senate Sergeant at Arms Retired Major General Rene Samonte nang dumating sa batasang pambansa ang convoy ng truck na may sakay na 167 ballot boxes ng COCs at 441 boxes ng ERs.

Matapos sumalang sa K9 inspection, ang mga ballot boxes at ERs ay inispeksyon ng Canvassing Board Secretariat bago isinailalim sa x-ray inspection.

Nasa halos 91% o 90.17% na o 156 COCs mula sa 173 COCs ang natanggap na ng senado na tuluy-tuloy sa pagtanggap ng COCs hanggang bukas.

Bukas, Martes ay magkakaroon ng joint session ang Senado at Kamara simula alas-10 ng umaga sa Batasang Pambansa at magko-convene bilang National Board of Canvassers ng alas-3 ng hapon. —sa ulat ni Tina Nolasco (Patrol 11)