Judith Estrada-Larino

Engaged na si Donita Rose sa kanyang boyfriend na si Felson Palad.

Sa kanyang instagram, ipinost ng US based celebrity ang kanyang selfie kasama si Palad at ipinakita ang suot-suot niyang engagement ring.

Ipinost pa ni Donita ang mga katagang “am now officially engaged! Na mayroong heart eyes emoji.

Dinagsa naman ng mga pagbati mula sa kanyang kapwa celebrity si Donita at soon to be hubby na si Felson.

Magugunitang nitong Abril lamang kinumpirma ni Donita ang kanyang relasyon kay Felson nang i-post ng aktres ang litrato nila ni Felson sa pag attend sa LA Fashion week 2022.

2020 ang lumipad pa Amerika si Donita at kasalukuyang corporate chef para sa isang US based Filipino supermarket chain.

Nakansela sa ikalawang pagkakataon ang nakatakda sanang pagsalang sa Commission on Appointments (CA) ng ilang opisyal ng COMELEC, Commission on Audit (COA) at Civil Service Commission (CSC).

Kabilang dito sina COMELEC Chairman Saldamen Pangarungan, COMELEC Commissioner George Garcia, COMELEC Commissioner Aimee Torrefrancia Neri, COA Chairperson Rizalina Noval Justol at  CSC Chairman Karlo Alexei Bendigo Nograles.

Nagtakda ng panibagong hearing ang CA Commmittte on Constitutional Commission  na pinamumunuan ni Senador Cynthia  Villar subalit nag mosyon si Senate Majority Leader Juan Miguel Zubiri na ipagliban ito sa Miyerkules, June 1 na siyang pinakahuling araw ng sesyon ng Kongreso.

Sinabi ni Zubiri na sa nasabing araw ay walang miembro ng CA ang  makakapag invoke ng CA Section 20 para harangin ang kumpirmasyon ng isang nominee at mayruon aniyang mga oppositor sa kumpirmasyon nina Pangarungan, Garcia at Neri.

Samantala, sa pagsisimula ng hearing ay binanggit din ni Zubiri ang nangyari noong February 2016 kung saan ay ini-invoke ni dating Senador Juan Ponce Enrile ang Section 20 at sinabi na makabubuti na ipaubaya na lang sa susunod na mauupong pangulo ang pagtatalaga ng posisyon sa ilang Constitutional Office. —sa ulat ni Cely Ortega-Bueno (Patrol 19)

Dalawampu katao ang nasawi sa naganap na pamamaril sa isang eskuwelahan sa Uvalde, Texas.

Kabilang sa mga nasawi ang 18- anyos na gunman, isang guro at labing walong mga estudyante na nasa Grade 2, 3 at 4 sa itinuturing na deadliest school shooting sa Amerika sa mga nakalipas na taon.

Ayon kay Governor Greg Abbott, ang suspek na isang local teenager ay pinaniniwalaang iniwan ang kanyang sasakyan at pumasok sa Robb Elementary School, bitbit ang kanyang baril at posibleng may kargado rin ng rifle.

Sinabi ni Abbott na ang suspek ay posibleng nabaril ng mga pulis na rumesponde sa nasabing insidente.

Pursigido ang Climate Change Commission (CCC) na solusyunan ang matinding pagbaha sa bayan ng Masantol sa Pampanga.

Kasunod na rin ito nang pagtungo ng mga opisyal ng CCC sa Masantol na nadiskubre nilang may baha pa rin kahit walang ulan.

Ang pagbaha sa nasabing bayan, ayon sa CCC ay dahil sa climate change gayundin sa high tide at paglalabas ng tubig mula sa isang dam.

Tiniyak ng CCC ang pagkakasa ng mga programa sa susunod na administrasyon at ang paghahanap ng solusyon  sa pagbaha sa masantol ang isa sa mga priority nila.

Nagkasa na ng pag aaral ang DENR para malaman kung may panganib sa kalusugan ang marble toys o holen.

Kasunod na rin ito ng pahayag ng ban toxics na nakakalasan ang holen dahil sa taglay nitong cadmium base na rin sa kanilang sariling pag aaral.

Ayon kay Ban Toxics Campaigner Thony Dizon, dapat mabatid ng publiko ang peligrong dulot ng mga holen na nabibili lang sa mga palengke at maaaring magdulot ng cancer kapag nagkaruon ng exposure rito.

Una nang inihayag ng ban toxics na ang mga holen na sinuri nila ay walang required labeling information na kinakailangan batay na rin sa Republic Act 10620 o Toy and Game Safety Labeling Act of 2013.

Nag convene na ang Kamara at Senado bilang National Board of Canvassers (NBOC) para magbilang ng mga boto sa pagka-Pangulo at pangalawang pangulo.

Pinangunahan nina Senate President Vicente Sotto, III at House Speaker Lord Allan Velasco ang pagbubukas ng joint session kaninang alas-10 ng umaga.

Ang Senate Contingent ay binubuo nina Senate Majority Leader Juan Miguel Zubiri, Senate President Protempore Ralph Recto, Senate Minority Floorleader Franklin Drilon at Senators Nancy Binay, Imee Marcos, Grace Poe at Pia Cayetano.

Samantala, ang House Contingent ay binubuo naman nina Majority Leader Martin Romualdez, Cavite Congressmen Jesus Crispin Boying Remulla at Abraham Tolentino, Pampanga Congressman Juan Bondoc, Marikina Representative Stella Quimbo, Ilocos Sur Representative Kristine Singson-Meehan at Aambis-Owa Party List Representative Sharon Garin.

Sinabi ni Zubiri na target ng NBOC na makapagdeklara ng bagong presidente at bise presidente bukas matapos magkasundo ang mga lider ng dalawang kapulungan na tapusin sa loob ng dalawang araw ang Canvassing of Votes. —sa ulat ni Tina Nolasco (Patrol 11) at Cely Ortega-Bueno (Patrol 19)

Ilang istruktura pa ang inihabol ng Task Force Bangon Marawi matapos maluwagan ang restrictions dulot ng COVID-19 pandemic.

Sinabi ni Task Force Spokesperson Felix Castro na nabinbin ang ilang proyekto sa lungsod dahil nag alisan ang mga manggagawa nuong pandemya na ang iba ay hindi na bumalik kaya’t naghanap pa sila ng bagong tauhan.

Nasa halos isang bilyong pisong pondo pa ng mga proyekto sa Marawi City ang hindi pa naipapatupad bagamat marami na ang naipatayo tulad ng 96 na barangay hall at ilang kalsada

Ayon pa kay Castro, mayroon na ring kuryente sa pinaka apektadong bahagi ng Marawi.

Patay ang hinihinalang rebelde sa ikinasang close air support launching ng militar laban sa umano’y Daulah Islamiyah Group sa Datu Salibo, Maguindanao.

Ayon sa 6th Infantry Division ng Philippine Army, nagsagawa sila ng operasyon matapos isumbong ang mga miyembro ng Daulah Islamiyah-Turaife Group na nangha-harass sa mga komunidad sa Sitio Patawali sa Barangay Ganta.

Kinilala ng mga otoridad ang nasawi na si Sadam Salandang alyas Sadam, umanoy miyembro ng BIFF Karialan Faction sa ilalim ni alyas Robot.

Sinabi ni 6th ID Commander, Lt. Col. Charlie Banaag, nai-turn over na sa local officials ng Datu Salibo ang labi ni Sadam para sa kaukulang paglilibing.

Hawak na ng Philippine Coast Guard (PCG) ang kapitan nang nasunog na MV Mercraft 2 na ikinasawi ng pito katao.

Ayon kay PCG Spokesperson Armand Balilo, isinasailalim na nila sa imbestigasyon si John Lerry Escareces para malaman partikular kung ano ang naging sanhi ng sunog.

Tiniyak ni Balilo ang pagsuri sa lahat ng physical evidence para mabatid ang dahilan ng sunog at matutukan kung mayruong hazardous materials na bitbit ang fast craft.

Hindi naman aniya masyadong luma ang fast craft subalit blangko sila kung fire prone ito dahil gawa ito sa fiber glass subalit pumasa naman sa standards kaya’t maituturing itong sea worthy.

Samantala, kabilang ang ina ng kapitan ng fast craft sa mga nasawi sa aksidente at kinilalang si Charito Escareces, 57 taong gulang at nakaligtas naman ang ama ng kapitan.

Wait and see pa ang COMELEC sa kahilingan ng Chinese Government hinggil sa pagsasagawa ng Overseas Special Elections sa Shanghai.

Sa gitna na rin ito ng mahigpit na pagpapatupad ng lockdown sa China dahil sa mataas na kaso ng COVID-19.

Ipinabatid ni COMELEC Acting Spokesperson John Rex Laudiangco, hiniling na nila sa China ang go signal para maituloy ang botohan sa Shanghai na hindi pa naman tinutugunan ng nasabing bansa.

Nasa halos 2,000 Filipino Overseas Voters ang nasa Shanghai.