Judith Estrada-Larino

Bumibilis na ang internet sa Pilipinas partikular nuong nakalipas na buwan.

Ayon sa speedtest Ookla, isang internet speed monitoring firm tumaas sa 22.54 megabits per second (MBPS) ang fixed mobile median download speed nuong Setyembre mula sa 22.35 mbps nuong Agosto.

Dahil dito, pumuwesto ang Pilipinas sa 85th place mula sa 139 countries na mino-monitor ng Ookla kaugnay sa mobile internet speed.

Samantala, ang fixed broadband median speed ay tumaas sa 78.69 mbps sa buwan ng Setyembre mula sa 78.33 mbps nuong Agosto.

Mula sa 50 Asian countries, nasa ika-14 na puwesto ang Pilipinas sa usapin ng fixed broadband at 29th place sa mobile broadband.

Kumikilos na ang Philippine National Police (PNP) para hubaran ng maskara ang nag-deposit ng 550,000 pesos sa bank account ni self-confessed gunman Joel Escorial sa pagpaslang kay broadcaster Percy Lapid.

Ipinabatid ni Southern Police District (SPD) Director Police Brigadier General Kirby Kraft na nakikipag-ugnayan na sila sa bangko at maging sa Anti-Money Laundering Council (AMLAC).

Malalaman dito aniya kung sino ang mastermind sa pagpatay kay Lapid kahit pa nasawi na ang itinuturong middleman sa kaso na si Crisanto Villamor.

Sinabi ni Kraft na tiniyak ng BJMP sa PNP na ise-secure nila ang ikalawang middleman matapos masawi si Villamor sa custody ng Bureau of Corrections (BuCor).

Ayon pa kay Kraft, nakakatanggap rin sila ng report hinggil sa naiispatang mga suspek sa nasabing kaso sa mga hindi tinukoy na lugar.

Lusot na sa House Committee on Basic Education and Culture ang panukalang pagtatayo ng mga pampublikong paaralan sa remote areas sa bansa.

Layon ng nasabing panukala na mapalakas din ang kalidad ng edukasyon sa tinaguriang geographically isolated disasvantaged conflict affected areas.

Batay sa panukala, ang Department of Education (DEPED) ang magsisilbing lead agency sa pagpapatupad ng batas partikular ang pagbuo ng mga panuntunan sa school requirements at construction timetable katuwang ang dpwh.

Lumalabas sa datos ng DEPED na nasa 9,000 last mile schools ang natukoy na at kanilang tinututukan na kabilang ang pagsasaayos ng mga access road patungo sa mga paaralan.

Sinuspindi si Bureau of Corrections (BuCor) Director General Gerald Bantag matapos masawi ang umano’y middleman sa pagpatay kay broadcaster Percy Lapid.

Ayon kay Justice Secretary Jesus Crispin Remulla, pinasuspindi ng Pangulong Ferdinand Bongbong Marcos, Jr. si Bantag matapos nilang magpulong kahapon para mabigyang daan anito ang patas na imbestigasyon sa kaso.

Ipinabatid ni Remulla na itinalaga niya si dating AFP Chief of Staff Gregorio Catapang, Jr. bilang Officer in Charge ng BuCor.