Gilbert Perdez

PATAY ang dalawang miyembro ng PNP-Special Action Force matapos makasagupa ang mga hinihinalang terorista sa Brgy. Lunoy, bayan ng Gamay sa Northern Samar.

Kinilala ang mga nasawi na sina Patrolman Franklin Marquez at Patrolman Jimmy Caraggayan, pawang mga miyembro ng PNP-SAF Commando Class 109.

Hindi naman binanggit kung may casualties sa panig ng mga kasapi ng NPA o New People’s Army.

Nabatid na tumugon ang mga saf troopers sa natanggap nilang sumbong mula sa mga residente hinggil sa presensya ng mga armadong lalaki sa lugar kung saan naganap ang bakbakan.

Patuloy na tinutugis ng mga tropa ng pamahalaan ang mga nakatakas na terorista.—mula sa ulat ni Jaymark Dagala

HUMINGI na ng tulong sa Department of Justice o DOJ ang mga bangko para sa paghahabol ng mga hinihinalang sangkot sa fraud at cybercriminals sa industriya.

Ayon kay Ramon Jocson, cybersecurity committee vice chairman ng  Bankers Association of the Philippines o BAP, tinatayang mahigit isang bilyong piso ang lugi nila kada taon dahil sa paglaganap ng fraud o scam ngayong mas marami na ang gumagamit ng digital transactions sa panahon ng pandemya.

Sinabi rin ni Jocson na nakikipagsanib-pwersa na rin sila sa iba’t ibang stakeholders tulad ng mag social media influencers, government agencies at media para sa mas malawak na kampanya laban sa cybercrimes.

MAGHAHAIN ng motion for reconsideration ang Department of Justice o DOJ sa korte matapos ibasura ang drug case laban kay Julian Ongpin, anak ni dating trade minister Roberto Ongpin.

Ayon kay Justice Secretary Menardo Guevarra, ilalabas nila sa media ang nilalaman ng kanilang mosyon kapag naihain na ito sa hukuman.

Matatandaang ibinasura ng korte ang kaso laban kay Ongpin dahil sa kawalan ng probable cause.

Una nang sinabi nina dating Senador Juan Ponce Enrile at Sorsogon Gov. Chiz Escudero na tama o walang mali ang naging hatol ni Presiding Judge Romeo Agacita, Jr. ng San Fernando City RTC sa kaso ni Ongpin.

KALABOSO ang isang babae matapos mahulihan ng higit 2 kilo ng umano’y shabu sa ikinasang operasyon sa Barangay Longos, Malabon.

Kinilala ang suspek na si Herssie Ogoy, 23 taong gulang, at nakatira sa nasabing lungsod.

Nasabat mula kay Ogoy ang 13.9 million pesos na halaga ng hinihinalang shabu na nakasilid sa mga Chinese tea bags.

Nakatakdang sampahan ng kaukulang kaso ang nasabing suspek.

ITINAAS na sa 12 milyong piso ang reward para sa sinumang makapagtuturo sa mga pumatay sa konsehal ng barangay sa Cagayan de Oro City.

Si Sherwin Uy, anak ni first district Rep. Rolando Uy, at ang kanilang caretaker na si Samuel Pabalan ay pinagbabaril ng hindi pa nakikilalang mga salarin habang nasa quarry sa pagitan ng Barangays Pagatpat at San Simon.

Nabatid na si Uy na konsehal ng Barangay San Simon ay kandidato sa pagka-alkalde ng lungsod sa susunod na taon.

Ayon sa ulat, tumugon ang maraming kaibigan at political supporters ng pamilya Uy sa “peso-peso” campaign para sa agarang ikadarakip ng pumaslang sa biktima.

SUGATAN ang isang lalaking pasahero sa insidente ng pambabato sa isang tren ng Metro Rail Transit o MRT-3.

Hindi naman tinukoy sa Facebook post ni Transportation Secretary Art Tugade ang pagkakakilanlan ng biktima at ng salarin.

Ayon kay DOTr Assistant Secretary Goddes Hope Libiran, nangyari ang pambabato pasado alas-sais kaninang umaga habang bumibiyahe ang isang bagon ng tren papuntang Magallanes Station ng MRT.

Patuloy ang imbestigasyon sa naturang insidente.