June 2026

Kapwa nagpalabas ng travel advisory ang Amerika at United Kingdom sa kanilang mga mamamayan na iwasan muna ang pagtungo sa Mindanao

Kasunod ito ng nagpapatuloy na bakbakan sa pagitan ng militar at ng Maute Terrorist Group sa Marawi City gayundin sa pagdideklara ng martial law duon

Batay sa inilabas na travel advisory ng US at UK Embassy sa Maynila, nakasaad na bagama’t wala pa silang impomrasyon hinggil sa pinakahuling sitwasyon sa Marawi, makabubuting planuhing maigi ang biyahe ng mga Amerikano na nasa Pilipinas

Pinapayuhan din ng US at UK government ang kanilang mga mamamayan na maging laging mapagmatyag, iwasan ang matataong lugar sa lahat ng oras upang matiyak ang kanilang kaligtasan

By: Jaymark Dagala

Nagpadala ng karagdagang puwersa ang Philippine Coast Guard sa Mindanao partikular na sa Marawi City na nasa ilalim ng batas militar

Ito’y ayon kay Coast Guard spokesman Commander Armand Balilo ay bilang suporta nila sa militar at pulisya dahil sa kasalukuyang tensyon sa lungsod

Kabilang sa mga ipinadala ng Coast Guard ayon kay Balilo ay ang dalawang multi – role response vessel na BRP Malabrigo gayundin ang BRP Tubbataha

Lulan aniya ng nasabing mga barko ng coast guard ang kanilang mga medical personnel at rescue teams na magsasagawa ng maritime patrol sa mga karagatang sakop ng Mindanao

By: Jaymark Dagala

Aminado ang militar na pahirapan ang sitwasyon ngayon sa Marawi City kasabay ng kanilang opensiba laban sa Maute Terrorist Group

Ayon kay AFP Public Affairs Office Chief Col. Edgard Arevalo, nagkalat kasi ang mga sniper mula sa panig ng mga bandido at nagtanim din ang mga ito ng I.E.D o Improvised Explosive Device

Karamihan kasi sa mga bandido ayon kay Arevalo ay nakaposte sa bubungan o sa rooftop ng mga kabahayan kaya’t maingat sila na huwag madamay sa crossfire ang mga sibilyan

Kabilang din sa mga nagpapahirap sa militar ay ang mabigat na daloy ng trapiko sa mga kalsada papasok at palabas ng Marawi City dahil sa paglikas ng mga residente

By: Jaymark Dagala

Nasa kamay na ng Kongreso ang kapalaran ng deklarasyon ni Pangulong Rodrigo Duterte hinggil sa pagsasailalim sa Mindanao sa batas militar

Ayon kay Presidential Chief Legal Counsel Atty. Salvador Panelo, ang kongreso bilang co-equal branch ng ehekutibo ay may kapangyarihan para palawigin o ibasura ang nasabing proklamasyon batay sa isinumiteng paliwanag ng Pangulo

Kumpiyansa naman si Panelo na pakikinggan ng Kongreso ang anumang magiging paliwanag ng Pangulo na nakabatay sa sitwasyon o kung hinihingi talaga ng pagkakataon

Samantala, ipinaliwanag naman ni Panelo na bagama’t may kapangyarihan si AFP Chief of Staff Gen. Eduardo Año sa militar at pulisya bilang administrador ng Mindanao, hindi pa rin nito maaaring tapakan ang mandato ng mga lokal na pamahalaan, legislative functions ng mga mambabatas na taga mindanao gayundin ang mga korte ruon

By: Jaymark Dagala

Hinihintay na lamang ng mga Senador ang kopya ng Proclamation 216 ni Pangulong Rodrigo Duterte na nagdideklara ng batas militar sa buong isla ng Mindanao

Gayunman, hati ang mga mambabatas sa usapin kung pumalya ba o hindi ang intelligence gathering ng pamahalaan kaya’t nakalusot ang teroristang grupo na Maute sa Marawi City

Ayon kay Senador Gringo Honasan na dating naglingkod bilang militar, bagama’t pabor siya sa pagdideklara ng martial law sa Mindanao, naniniwala siyang hindi pumalya ang intelligence kundi nagkulang lamang sa koordinasyon

Para naman kina Senador Juan Miguel Zubiri at Panfilo Lacson, pumalya ang intelligence gathering ng militar dahil nabigla ang mga ito sa biglang paglaki ng puwersa ng mga kalaban na dahilan upang makubkob ang lungsod

Sa panig naman nila Senadora Riza Hontiveros at Senador Antonio Trillanes, nakababahal ang ginawang pagdideklara ng martial law ng Pangulo lalo’t naniniwala silang wala namang pangangailangan para gawin ito

By: Jaymark Dagala

Nagbabala  si Pangulong  Rodrigo Duterte na  magiging  marahas  ang pagpapatupad  ng  Martial Law   lalo na  sa  mga  lalaban sa  gobyerno.

Sa  kanyang   pagdating  kahapon mula sa  maiksing  pagbisita sa  Russia, sinabi ng  Pangulo na hindi siya  mangingiming  gawin ang  lahat  para maprotektahan ang  sambayanan.

Inatasan ng  Pangulo ang  Armed  Forces  of the  Philippines  para  ipatupad  ang  batas  militar, at  lahat  ng  mga  grupong lalaban sa  puwersa  ng  gobyerno ay mamamatay.

Mariing  sinabi ni Pangulong  Duterte na  shoot  to kill ang  sasapitin ng  sino mang  lalaban sa  tropa  ng  pamahalaan lalo na  yaong  may mga  itinatago o illegal na  nag-iingat  ng mga  armas.

Bilin ng  Pangulo sa  militar, walang  sasantuhin  at  ibalik ang  kaayusan sa  bansa.

Kasabay  nito  kinalma  ng punong  ehekutibo ang   ordinaryong  mamamayan na  walang  atraso o masamang  ginagawa  na   huwag matakot  dahil hindi sila  gagalawin  ng  mga  otoridad.

Sinabi  ng Pangulo na  bukas  ang  mga  Korte   sa  buong  Mindanao  at  papayagan ang  mga  pag-aresto ng  walang  warrant, paghalughog  at  checkpoints.

Kapag  aniya  identified  ang  isang  sibilyan na   kontra sa gobyerno,  agad  itong  aarestuhin at  idedetini ng  mga  otoridad.

Para  naman sa  mga  Muslim at  Kristiyanong  may mga  lisensiyadong  baril, sinabi ng  Pangulo na  ipakita  lamang  ito sa  mga  otoridad  at  patunayang  kailangan ito para  protektisiyonan ang  kanilang  mga  pamilya.

By: Meann Tanbio / Aileen Taliping