Tiyak na sasampahan ng kaso at posibleng matanggalan pa ng lisensya ang sinumang lalabag sa ipinatutupad na labinlimang (15) araw na gun ban ng pambansang pulisya.
Ito’y makaraang maging epektibo na ang gun ban noon pang undas na tatagal hanggang sa Nobyembre 15 bilang bahagi ng seguridad sa isasagawang ASEAN summit sa Metro Manila gayundin sa Central at Southern Luzon sa susunod na lingo.
Ayon kay C/Supt. Val De Leon, hepe ng Philippine National Police o PNP Firearms and Explosives Ordinance Division, aarestuhin agad nila ang sinumang mahuhuling magdadala ng baril sa mga nabanggit na petsa.
Suspendido rin aniya sa mga panahong ito ang permit to carry firearms outside of residence at wala rin aniya silang binigyan ng exemption para magdala ng armas ang mga sibilyan sa mga panahong ito.
Giit ni De Leon, tanging ang mga tagapagpatupad lamang ng batas ang pinapayagang magdala ng baril tulad ng pulis at sundalo bilang bahagi ng kanilang pagbibigay seguridad sa mga darating na delegado at heads of state.
