Nakatakdang tumestigo si Senate Minority Leader Juan Ponce Enrile sa Korte kaugnay sa ipinaglalaban na P139 million retirement benefits ng mga retiradong miyembro ng Public Attorneys Office.
Ayon kay PAO Chief Persida Rueda-Acosta, haharap si Enrile sa sala ni Quezon City Regional Trial Court Judge Hilda Loja Pangilinan sa Biyernes, alas-8:30 ng umaga.
Bukod kay Enrile, te-testigo rin si dating Bayan Muna Representative Teddy Casino na siyang nag-akda sa PAO Law sa mababang kapulungan ng Kongreso.
Matatandaang 16 na PAO retirees ang naghain ng reklamo laban kina Budget Secretary Butch Abad at DBM Chief Legal Atty. Candice Ruiz dahil sa pang-iipit ng mga ito sa kanilang retirement benefits.
Pinagbabayad ng mga petitioner sina Abad at Ruiz ng P400,000 para sa exemplary damages at P400,000 para sa moral damages.
By: Meann Tanbio
