Kumikilos na ang Philippine National Police (PNP) upang mahanap ang katawan ni John Ridsdel, ang Canadian na pinugutan ng Abu Sayyaf sa Jolo, Sulu.
Ayon kay PNP Chief Dir. Gen. Ricardo Marquez, tinututukan na ng PNP ang paghahanap sa katawan ng dayuhan, matapos makumpirmang kay Ridsdel ang ulo na nakitang nakabalot sa isang plastic.
Napaso na kahapon ang ikalawang deadline na ibinigay ng Abu Sayyaf, para sa hinihingi nilang P300 milyong pisong ransom para sa pagpapalaya ng bawat isang biktima.
DFA
Samantala, nagpahatid na din ng pakikiramay ang Department of Foreign Affairs (DFA), sa pamahalaan ng Canada at sa naiwang pamilya ni John Ridsdel na pinugutan ng Abu Sayyaf.
Ayon sa Department of Foreign Affairs, nakikiisa ang pamahalaan sa pagdadalamhati para sa Canada dahil sa pagkamatay ng isa nitong mamamayan dahil sa walang kuwentang karahasan.
Nagpahayag din ang DFA ng pagsuporta sa mga unipormadong sundalo na patuloy na nagsasakripisyo ng kanilang buhay sa pagtatangkang mailigtas ang mga bihag.
By Katrina Valle | Jonathan Andal (Patrol 31)