Inilikas na ang mga residente sa barangay Bagong Sikap at Tagumpay sa Gabaldon sa lalawigan ng Nueva Ecija bunsod pa rin ng bagyong Nona.
Inihayag ito sa DWIZ ni Gabaldon, Nueva Ecija Mayor Rolando Bue.
Kasabay nito, ipinabatid ni Bue na wala pa namang naiulat na casualty sa kanyang nasasakupan.
“Hanggang ngayon po ay wala namang report sa akin ng ating mga punong barangay maging ang ating PNP, at ating Municipal Disaster Risk Reduction Council, magmula pa po kahapon, wala naman pong naging casualty itong bagyong Nona sa aming bayan.” Pahayag ni Bue.
Cabanatuan
Lubog ngayon sa tubig-baha ang 62 barangay sa Cabanatuan City, Nueva Ecija dahil sa bagyong Nona.
Ayon kay Cabanatuan City Mayor Julius Cesar “Jay” Vergara, apektado ng tubig-ulan ang ilang barangay sa siyudad at mahihirapan nang pasukin ang ilang lugar dahil sa mataas na baha.
Dahil dito, umaapela ng tulong ang alkalde sa provincial government at nakiusap na unahin ang pagtulong sa mga biktima ng bagyo.
Nanawagan din si Vergara sa Philippine Army na magpadala ng 6×6 trucks at karagdagang rubber boats.
By Meann Tanbio | Ratsada Balita
