Kumpiyansa ang House prosecution panel na matibay ang kanilang inilabas na ebidensiya sa Article 4 ng impeachment complaint laban kay Vice President Sara Duterte kaugnay ng pagbabanta sa buhay ni Pangulong Ferdinand Marcos Jr.
Ayon kay House Impeachment Legal Spokesman and Counsel for the Prosecutors Atty. Benjamin Tolosa Jr., isinailalim man sa cross-examination ng defense team ang kanilang testigo na si NBI Senior Agent John Mark Calilung, hindi nito matitibag ang katotohanan sa alegasyon.
Gayunman, iginiit ni Atty. Tolosa na karapatan ng depensa na usisain ang saksi, ngunit nananatili aniya ang kanilang tiwala na matibay ang mga nauna nilang ebidensya.
Tiniyak ng prosekusyon na mas lalong titibay ang kanilang ebidensya kapag iniharap na ang susunod nilang testigo na si NBI Regional Director Jeremy Lotoc, na inaasahang dadalo sa impeachment trial sa susunod na linggo.—sa panulat ni Jordan Gutierrez
