Iginiit ng political analyst na si Dr. Froilan Calilung na nananatiling 16 na boto ang kinakailangan upang mahatulan sa impeachment trial si Vice President Sara Duterte, alinsunod sa 1987 Constitution.
Ayon kay Dr. Calilung, malinaw na nakasaad sa Saligang Batas na kinakailangan ang boto ng two-thirds ng lahat ng senador o 16 sa kabuuang 24 na miyembro ng Senado. Aniya, hindi dapat ibatay ang bilang sa dami lamang ng mga senador na aktuwal na dumadalo o nakaboboto sa paglilitis.
Bagama’t maaari umanong baguhin ng Senado ang ilang procedural mechanisms o mga panuntunang may kaugnayan sa proseso ng paglilitis. Gayunman, aniya, isang malaking usapin ang pagbabago sa mga substantive elements na nakasaad sa Konstitusyon dahil ito ay hindi basta-basta maaaring baguhin
Binigyang-diin din ni Dr. Calilung na hindi dapat binabago ang mga umiiral na patakaran habang isinasagawa ang proseso upang umayon sa anumang pampulitikang interes. Aniya, mahalagang manaig ang pagsunod sa Saligang Batas upang mapanatili ang integridad ng proseso at mapangalagaan ang demokrasya.
Dagdag pa niya, mananatiling bahagi ng kabuuang bilang ng mga senador ang isang miyembro hangga’t hindi ito nagbitiw sa tungkulin, namatay, o nawalan ng karapatang gampanan ang posisyon batay sa itinakda ng batas. Dahil dito, aniya, nananatiling 16 na boto ang kinakailangan para sa conviction sa impeachment trial.
