Sugatan ang isang Grade 8 student matapos saksakin ng kapwa menor de edad sa labas ng isang paaralan sa Las Piñas City.
Ayon sa pulisya, kagagaling lamang ng biktima sa paaralan at bibili sana ng inumin kasama ang mga kaibigan nang harangin sila ng grupo ng mga suspek. Matapos silang pagbabatuhin ng hollow blocks, hinabol at sinaksak ang biktima sa likod at iba pang bahagi ng katawan.
Agad na naitakbo sa ospital ang biktima habang naaresto ang apat na menor de edad na sangkot sa insidente. Patuloy namang tinutugis ng mga awtoridad ang pangunahing suspek na pinaniniwalaang nanaksak.
Mahaharap ang mga naarestong suspek, na pawang 15 hanggang 17 taong gulang, sa kasong frustrated murder at attempted murder.
