Nilinaw ng Quezon City Police District (QCPD) na walang katotohanan ang kumalat na mga post sa social media tungkol sa umano’y insidente ng pamamaril sa isang paaralan sa Barangay Bagong Silangan, Quezon City.
Batay sa paunang imbestigasyon, dakong alas-9:00 ng umaga nitong Hulyo 2, nagsasagawa ng nakatakdang pulong sa pamunuan ng paaralan ang mga tauhan ng Payatas-Bagong Silangan Police Station (PS 13) nang makarinig ng malakas na ingay mula sa ikalawang palapag ng gusali.
Agad na nagtungo sa lugar ang mga pulis upang beripikahin ang insidente.
Lumabas sa kanilang imbestigasyon na ang narinig ng mga estudyante ay malakas na kalabog mula sa isang kalapit na construction site na napagkamalang putok ng baril.
Kinumpirma ng QCPD na walang naganap na pamamaril, walang nasugatan, at walang naitalang anumang hindi kanais-nais na insidente.
Ligtas na rin ang sitwasyon at nagpatuloy ang normal na klase sa paaralan.
Kasabay nito, muling pinaalalahanan ng QCPD ang publiko na huwag magbahagi ng mga hindi beripikadong impormasyon sa social media upang maiwasan ang pagkalat ng maling balita at hindi kinakailangang pag-aalala.
Hinikayat din ang publiko na tiyaking mula sa opisyal na mga ahensya ng pamahalaan at law enforcement ang impormasyong kanilang ibinabahagi. | via Jenn Patrolla (Patrol 38)
