Pinagpapaliwanag ni House Assistant Majority Leader at Las Piñas Rep. Mark Anthony Santos ang Villar Group sa papel nito sa pagkaantala ng Light Rail Transit Line 1 Cavite Extension Project.
Ayon kay Santos, umapela kamakailan ang Department of Transportation sa Villar Group na aprubahan nito ang inihahaing right-of-way usage agreement ng kagawaran para sa pagsasagawa ng mga istasyon ng tren.
Dekada na anya kasi ang paghihintay ng mga residente ng Las Piñas City at ng lalawigan ng Cavite sa pagtatapos ng naturang proyekto; kaya nararapat lamang na sagutin ng naturang kumpanya sa publiko kung bakit nauunsyami ang pagpapatapos sa LRT-1 Cavite Extension.
Dagdag pa ni Santos, bagaman nagkakahalaga ang proyekto ng halos P65 bilyon, mas malaki pa ang proyekto kaysa alinmang indibidwal o pribadong interes.
Iginiit pa ng kinatawan ng Las Piñas na mahalaga ang pagtatapos sa LRT-1 Cavite Extension dahil susi ito sa pagpapagaan ng daloy ng trapiko sa Katimugang Metro Manila at Cavite, lalo na sa Alabang-Zapote Road at Marcos Alvarez Road. — Sa panulat ni Anjo Riñon
