Kinumpirma ng Office of the Ombudsman na target nilang maipakulong ang aabot sa animnapung indibidwal na sangkot sa maanomalyang flood control projects bago magpasko.
Kasunod ito ng pahayag ni Public Works Secretary Vince Dizon na nasa animnapung personalidad na sangkot sa kontrobersya, kabilang na mismo ang mga opisyal ng Department of Public Works and Highways ang maipakukulong bago matapos ang taon.
Gayunman, binigyang-diin ni Assistant Ombudsman Mico Clavano na kailangan pa rin nilang sundan ang proseso sa mga mapatutunayang dawit sa flood control anomalies.
Sinabi naman ni Sec. Dizon na maghahain pa sila, kasama ang Independent Commission for Infrastructure, ng mas marami pang reklamo sa Ombudsman sa mga susunod pang linggo.
Umaasa rin ang kalihim na maresolba na ang mga naunang reklamo na kanilang isinampa at maiaakyat na ito sa Sandiganbayan para sa pormal na paglilitis ng unang batch ng mga kasong iniuugnay sa maling paggamit sa pondo ng bayan.
