Hindi hihinto sa flood control projects ang gagawing pagsilip ng Malakanyang sa mga naabusong proyekto, kung saan mayroong pondo ng taumbayan ang nagasta, ngunit wala namang resultang naipakita sa mga Pilipino.
Ito ang sinabi ni Pangulong Ferdinand Marcos Jr., kasunod ng utos sa Department of Public Works and Highways na isumite ang listahan ng mga flood control projects na nasimulan o nakumpleto sa loob ng tatlong taon, upang mapanagot ang mga nasa likod ng substandard, hindi natapos, o ghost flood control projects.
Sa ikatlong podcast ng Pangulo, sinabi nito na ang pagbusisi o pagsilip sa mga kwestyunableng flood control project ay dapat na ipatupad rin sa iba pang proyekto ng gobyerno.
Kailangang mahanap ang lahat ng mga nanamantala, at nakibang sa pondo ng mga Pilipino.
Babala ng Pangulo, sinuman ang naging kasabwat sa mga ganitong akto ng katiwalian, mapa-kontraktor, opisyal ng pamahalaan, kaalyado man o hindi ng administrasyon, pasensyahan na lamang at mananagot sa batas ang mga ito.
