Kinumpirma ng Department of Health na ang paglobo ng bilang ng mga tinatamaan ng Human Immunodeficiency Virus sa Pilipinas ay dahil sa pagtatalik ng lalaki sa lalaki.
Batay sa record ng DOH, 95% ng mga bagong kaso ng HIV sa bansa ay nakuha sa pakikipag-talik ng mga lalaki sa kapwa nila lalaki at hindi nagmula sa mga sex workers.
Ayon kay Health Secretary Ted Herbosa, sa kanilang pagtaya, aabot sa 400,000 tao ang magiging persons living with HIV sa taong 2030, kung hindi nila pipigilan ang pagsirit ng kaso ng HIV.
Nauna nang binigyan-diin ng Kalihim na ang pilipinas ang nangunguna ngayon sa buong mundo na may pinakamabilis na pagtaas ng bilang ng mga nagkakaroon ng HIV.
Kasunod nito, sinabi ni Secretary Herbosa na nakipag-ugnayan na siya kay Pangulong Ferdinand Marcos Jr. para sa pagdeklara na ng national public health emergency kaugnay sa tumataas na kaso ng nasabing sakit.
