Winasak ng buhawi ang 50 kabahayan sa bayan ng Oton, Iloilo at Iloilo City kahapon ng umaga.
Sa pahayag ng Iloilo City Social Welfare and Development Office, sa kabuoang bilang, 39 na bahay ang nasira sa mga Barangay ng Santo Domingo at Santa Cruz kung saan, 15 dito ang partially damaged at anim naman ang naitalang totally damaged sa Barangay Santo Domingo.
Nasa 12 naman ang naitalang partially damaged at anim ang totally damaged sa Santa Cruz.
Samantala, 15 bahay din sa Barangay Alegre na sakop ng Oton, Iloilo ang nasira ng buhawi kung saan, sapilitang inilikas ang mga residente sa mas ligtas na lugar.
Ayon sa mga otoridad, ilang mga puno at poste ang natumba habang may mga kable rin ng kuryente ang nagbagsakan.
Sa ngayon, patuloy pang inaalam ang kabuuang bilang ng mga apektadong pamilya maging ang halaga ng pinsala sa nabanggit na lugar.
