Welcome sa grupong Samahang Industriya ng Agrikultura (SINAG) ang desisyon ng Department of Agriculture (DA), na hindi na ituloy ang planong pagbebenta ng puslit na puting sibuyas sa Kadiwa centers.
Sa panayam ng DWIZ kay Rosendo So, Chairman ng SINAG, inihayag nito ang pagkatuwa sa desisyon na tulong hindi lamang sa mga lokal na magsasaka kundi sa mga mamimili.
Gayunman, pinanindigan pa rin ni So ang panawagan nitong parusahan ang mga nagpupuslit ng sibuyas.
Maliban sa sibuyas, ilang kahon din ng carrots na nakadeklara bilang “assorted foodstuffs”, ang nakita ng Bureau of Customs (BOC) at Department of Agriculture (DA) sa Port of Subic.
Iba pa ito sa mahigit 300 karton ng expired na karne o botcha na nakumpiska naman sa isang storage facility sa Tondo, Maynila.
Dahil dito, nanawagan si So sa BOC na higpitan pa ang pagbabantay upang mapigilan ang insidente ng pagpupuslit ng produkto sa bansa.
