Hindi pa nasasampahan ng PNP-Criminal Investigation and Detection Group (CIDG) ang mga umano’y sangkot na mga indibidwal sa pagkawala ng mga sabungero.
Ayon kay CIDG Spokesperson, PLt. Col. Marissa Bruno, sa ngayon kasi ay wala pa silang nakukuhang feedback mula sa mga imbestigador na may hawak ng kaso.
Pero inihayag naman ni PNP PIO Chief PBGen. Roderick Alba, dahil sa pagpupursige ng mga taga-CIDG, nadadagdagan na ang mga ebidensya na kanilang nalilikom.
Matatandaang una nang sinabi ng CIDG na sasampahan nila ng kasong kidnapping at serious illegal detention ang mga security personnel sa Manila Arena kung saan huling namaytaan ang anim na nawawalang sabungero.
Sa ngayon, aabot na sa tatlumpu’t apat na sabungero ang kasalukuyan pa ring hinahanap. —sa panulat ni Abie Aliño-Angeles