Hinimok ng Catholic Bishops’ Conference of the Philippines (CBCP) ang mga mananampalataya na kung maari ay huwag munang magdaos ng magarbong Christmas parties bilang pakikisimpatiya sa mga biktima ng bagyong Odette.
Bagkus ay hinihikayat ni CBCP President Bishop Pablo Virgilio David ang mga mamamayan na tumulong na lamang sa relief operations.
Aniya, imbes na gumastos para sa magagarbong party at exchange gifts ay mas mainam na ibigay na lamang ito bilang tulong sa mga naapektuhan ng kalamidad.
Una nang idineklara ng CBCP bilang National Day of Prayer ang December 25 at 26 para sa mga biktima ng bagyo.
Hinikayat din ang mga diocese na magsagawa ng second collection sa kanilang misa para sa relief operation ng Caritas Philippines.
