Binigyang linaw ng pamunuan ng Food and Drug Administration (FDA) na hindi aprubado ang “Leronlimab” bilang gamot para sa mga COVID-19 patients.
Sa isang pahayag, sinabi ng FDA na ang Leronlimab ay isa pang investigational product ay sumasailalim sa clinical trials bilang panggamot naman sa cancer at HIV.
Pero nabatid na ito’y iniimbestigahan na rin para magamit sa mga pasyenteng dinapuan ng COVID-19.
Kasunod nito, inamin ng FDA na nagbigay sila ng Compassional Special Permit (CSP) sa ilang espesyalista para sa naturang gamot.
Paglilinaw ng FDA, na maaaring mabigyan ng CSP ang mga doktor o ospital para gumamit ng isang investigational drugs, hindi rehistradong gamot para sa mga pasyente na malubha ang karamdaman.
Sa huli, binigyang diin ng FDA na ang mga may hawak na CSP ang responsable sa paggamit ng naturang gamot at kinakailangang magsumite ng report sa ahensya para sa magiging resulta nito.