Hiniling ni Philippine National Police (PNP) Chief P/Gen. Debold Sinas sa Inter-Agency Task Force (IATF) na isama sa priority list ng mga mababakunahan kontra COVID-19 ang mga miyembro ng Joint Task Force COVID-19 Shield.
Kabilang ang mga ito sa tinatawag na frontliners ng COVID-19 na nagmamando ng trapiko at nagbabantay sa iba’t ibang quarantine controlled points o checkpoint.
Ayon kay Sinas, malaking bagay ito lalo pa’t mahigpit nilang ipinatutupad ang NCR plus Bubble kung saan, hindi maaaring makapasok at makalabas ang mga tao mula Metro Manila, Bulacan, Rizal, Laguna at Cavite upang pigilan ang ibayong pagkalat ng COVID 19.
Paliwanag ng PNP chief, round the clock ang ginagawa nilang pagharap sa mga checkpoint at iba’t ibang tao ang kanilang nakasasalamuha, hindi alintana kung kontaminado o hindi ang mga iyon ng virus.
Sa kabila ng mga hamon at limitasyon, ipinagmamalaki pa rin ni Sinas ang hanay ng PNP na gumanap ng napakalaking sakripisyo para sa mga mamamayan lalo na sa mahigpit nilang pagpapatupad ng health and safety protocols. —ulat mula kay Jaymark Dagala (Patrol 9)