Pinaiimbestighan na ng Department Of Health o DOH ang nasayang umanong Astrazeneca COVID-19 vaccines na aabot sa 7,500 doses dahil sa hindi angkop ang temperatura nito habang dinadala sa Bicol region.
Ayon kay Health Undersecretary Ma. Rosario Vergeire, may nauna nang isinasagawang imbestigasyon kaugnay dito kung saan lumabas na nagkaroon ng problema sa transportasyon ng bakuna subalit patuloy pa itong iimbestigahan ng DOH.
Samantala, nagpahayag naman ng pagkabahala si Senadora Nancy Binay kaugnay sa ulat na ito na aniya’y dahil sa kapabayaan nasa 7,500 katao ang nawalan ng bakuna na makapagliligtas sana laban sa banta ng COVID-19 gayong kulang ang suplay ng bakuna ng bansa.
Matatandaang, lumabas sa unang isinagawang imbestigasyon ng DOH central office na dahil sa sirang thermometer na inilagay ng third party logistic, kaya’t hindi akma ang lumabas na temperatura nang sukatin ang mga naturang bakuna. —sa panulat ni Agustina Nolasco