Mananatili pa ring naka-self quarantine si Interior and local Government Secretary Eduardo Año sa kabila ng pagiging negatibo na sa coronavirus disease 2019 (COVID-19).
Ayon kay Año, bahagi ito ng protocol para matiyak na “cleared” o malinis at ligtas na siya sa virus.
Tiniyak din ni Año na magpapatuloy siya sa kanyang work from home status kahit naka-self quarantine pa rin.
Kahapon, inanunsyo ng kalihim na natanggap niya na ang resulta ng panibagong test na isinagawa sa kanya ng Research Institute for Tropical Medicine kung saan nag-negatibo na siya sa COVID-19.
Unang kinuhanan ng sample si Año noong Marso 25 matapos may makasalamuhang positibo sa COVID-19 at lumabas na infected siya noong Marso 31.
